Өнгөрсөн жилийн хүн ам, орон сууцны тооллогоор нийслэлийн хамгийн их хүн амтай дүүрэг болоод байгаа Баянзүрх дүүрэгт гуравдугаар амаржих газрыг шинээр барихаар өнөөдөр шавыг нь тавилаа. Гуравдугаар төрөх нь 1966 онд 150 ортойгоор Найрамдлын районы төрөх эмнэлэг нэртэйгээр байгуулагдаж байсан бөгөөд 1990-ээд онд төрөлт эрс буурсан тул 1998 онд татан буулгасан байна. 2000 онд 45 ортойгоор дахин ашиглалтад оруулсан ч эдүгээ хүчин чадал нь хүрэлцэхээ байж, өдөртөө 95-100 эх хүлээн авдаг болжээ.

Иймд Засгийн газраас хөрөнгийн асуудлыг шийдвэрлэж, Энэрэл эмнэлгийн суурин дээр шинэ төрөх барихаар болсон байна. Барилгын гүйцэтгэгчээр “Их өргөө” ХХК ажиллах агаад ирэх оны нэгдүгээр улиралд багтаан ашиглалтад хүлээлгэн өгөх юм. Энэхүү шинэ эмнэлэгт жирэмсэн эхчүүдийг хүлээж авахаас гадна төрөхийн өмнөх болон дараах эмчилгээ үйлчилгээ үзүүлэх, охид, эмэгтэйчүүд болон физик, уламжлалт эмчилгээний тасаг ажиллуулахаар төлөвлөж, эмч ажилчдынхаа мэдлэг, мэргэжлийг дээшлүүлэх, давтан сургахад анхаарч байгаагаа тус эмнэлэгийн дарга энд хэлсэн үгэндээ онцоллоо.