УИХ дахь эмэгтэй гишүүдийн бүлгийн санаа­чилгаар Зүүн хойд Азийн эмэгтэй парламентчдын чуулга уулзалт арваннэгдүгээр сарын 24-25-нд “Бо­ловсролоор дамжуулан энх тайван, хөгжлийг урагш­луулахад эмэгтэй пар­ламентч­дын гүйцэтгэх үүрэг” сэдвийн дор болж байна.

Тус чуулга уулзалтад ОХУ, БНХАУ, БНАСАУ, БНСУ-ын төлөөлөгчид, НҮБ, түүний салбар байгууллагууд, Азийн сан зэрэг боловсрол, эмэгтэйчүүдийн оролцоо, хүний эрхийн чиглэлээр идэвхтэй үйл ажиллагаа явуулдаг олон улсын бай­гууллагуудын төлөөлөл оролцож байна.

Чуулга уулзалтыг нээж УИХ-ын дарга З.Энхболд, Гадаад хэргийн сайд Л.Болд, УИХ-ын гишүүн М.Батчимэг болон төлөөлөгчдийн багийн тэр­гүүнүүд үг хэллээ. Нэг­дүгээр хуралдааны үеэр төлөөлөгчид Ардчиллын боловсролын асуудлаар НҮБ болон ЮНЕСКО-гоос гар­гасан тогтоолууд, Энх тайван ба хөгжил дэвшлийг урагшлуулахад дэлхийн иргэнийг төлөвшүүлэх ЮНЕСКО-гийн зорилтын гүй­цэтгэх үүргийн талаар хэлэлцсэн юм.

Чуулга уулзалтад Монгол Улсаа төлөөлж УИХ-ын гишүүн Д.Оюунхорол “Иргэний боловсролыг хөгжүүлэхэд эмэгтэй пар­ламентчдийн үүрэг, роль” сэдвээр үндсэн илтгэл хэлэл­цүүлсэн юм.

Эмэгтэйчүүдийн цалин хөлстэй ажил эрхлэлтийг нэмэгдүүлж, өрхийн биз­несийг хөгжүүлэх, бага орлоготой эмэгтэйчүүдийг төрийн бодлогоор дэм­жин тэтгэх бодлого хэрэг­жүүлэхийг бид үе үеийн Засгийн газарт санал болго­соор ирсэн.

Монголын хатад эмэгтэйчүүд хүүхэд залуу үеэ сурган хүмүүжүүлэх, нийгмийг соён гэгээрүүлэхэд чухал үүрэг гүйцэтгэж ирсэн. Эмэгтэйчүүдийн чин хүсэл нь үр хүүхдээ эрүүл аюулгүй орчинд өсч торнин боловсрол эзэмших бололцоог бүрдүүлэхэд төрийн дэмжлэг чухал байгааг илэрхийлж, өв уламжлалаа үе дамжуулан хөгжүүлдэг ард түмэн, улс үндэстэн ирээдүй хойчдоо хүндтэй гавьяа байгуулдаг хэмээн онцлов.

Хүүхдийг сургуулийн өмнөх боловсролд хам­руулах нь тэдний нийгэм­шил, төлөвшилтөд онцгой нөлөөлөхөөс гадна эхчүүдийн хөдөлмөр эрхлэлт, сурч боловсрох асуудалд давхар нөлөөлдөг.

Түүнчлэн өсвөр насан­даа хүүхэд төрүүлж, мэр­гэжил, боловсрол эзэм­шиж чадаагүй эмэг­тэй­чүүд хөгжих боломжоо алдаж байгаа тул хот суурин болон орон нутгийн залуу эхчүүдэд чиглэсэн онлайн, зайны сургалтыг ашиглан боловсролыг хүртээмжтэй хүргэх шаардлагатай байна.

Эмэгтэйчүүдийн цалин хөлстэй ажил эрхлэлтийг нэмэгдүүлж, өрхийн биз­несийг хөгжүүлэх, бага орлоготой эмэгтэйчүүдийг төрийн бодлогоор дэм­жин тэтгэх бодлого хэрэг­жүүлэхийг бид үе үеийн Засгийн газарт санал болго­соор ирсэн. Энэ нь эмэг­тэй­чүүдийн ядуурлыг цаашлаад нийгмийн ядуурлыг бууруулах боломжтой.

Эмэгтэй хүн, эх хүний үүрэг хариуцлага нь төр засгийн аливаа үйл ажиллагааг тунгалагшуулах, гарч байгаа шийдвэрийг ний­гэмд аль болох ойр, хүртээмжтэй байдлаар хүлээн авахад нөлөөлөх бөгөөд энэ ч үүднээсээ нийгэм, ард иргэдийн харилцан ойл­голцол, улс орны хөгжилд илүү нарийн торгон ухаанаар хандаж бэхжүүлэх чад­вартай гэж боддогоо илэр­хийлсэн юм.