Өчигдөр АН-ын бүлэг ээлжит хурлаа хийж таван асуудал хэлэлцлээ. Бүлгийн дэд ахлагч Л.Гантөмөр хуралдааны дараа мэдээлэл хийсэн юм. Тэрбээр «Хууль, УИХ-ын бусад шийдвэрийн төсөл боловсруулах, өргөн мэдүүлэх журмын тухай хуульд нэмэлт оруулах  тухай хуулийн төсөл, Засгийн газрын 2008-2012 оны үйл ажиллагааны хөтөлбөрийн хэрэгжилт, Эрүүгийн хуульд нэмэлт оруулах тухай хуулийн төсөл, Хот, суурингийн ус хангамж, ариутгах татуургын ашиглалтын тухай хуулийн шинэчилсэн найруулга болон Хот, суурингийн ус хангамж, ариутгах татуургын ашиглалтын тухай хуулийг хүчингүй болсонд тооцох тухай хуулийн төсөлтэй танилцлаа. Засгийн газрын 2008-2012 оны үйл ажил лагааны хэрэгжилттэй холбоотой мэдээллийг Ч.Хүрэлбаатар өгөх байсан боловч МАН-ын бүлгийн хуралдаанд оролцсон тул энэхүү асуудлыг хэлэлцсэнгүй.

УИХ-ын гишүүн Ц.Сэдванчиг нарын өргөн мэдүүлсэн Эрүүгийн хуульд нэмэлт оруулах тухай хуулийн төсөл хэлэлцэх эсэх талаар намын бүлгийн гишүүд авч хэлэлцээд дэмжих нь зүйтэй гэж үзлээ. Энэхүү хуульд тендер будлиантуулсан, авилга авсан, зуучилсан зэрэг хууль бус үйлдэл хийсэн этгээдэд эрүүгийн хуулийн дагуу хариуцлага ногдуулдаг байхаар зааж өгсөн байгаа юм. Дээрх асуудлаас үүдэн ноцтой, онц их хэмжээний хохирол учруулсан бол нөхөн төлүүлдэг болох, төрийн албан хаагч тендер будлиантуулах үйл ажиллагаанд ямар нэг хэмжээгээр оролцсон нь тогтоогдох юм бол дахин төрийн албанд ажиллуулахгүй. Энэ эрхийг нь бүр мөсөн хясна. Өмнө нь, зөвхөн гүйцэтгэгч буюу тендерт ялсан компанид хариуцлага тооцдог байсан бол одоо аль алинд нь тооцож, хохирлыг бүрэн барагдуулдаг болгоно» гэсэн юм.

Хот, суурингийн ус хангамж, ариутгах татуургын ашиглалтын тухай хуулийн шинэчилсэн найруулгын төслийг цааш хэлэлцэх зөв гэж тус бүлгийнхэн үзэн УИХ-д өргөн мэдүүлэхээр болжээ. Дээрх хууль нь 2002 онд батлагдсан бөгөөд түүнээс хойш нэг ч удаа өөрчлөлт оруулаагүй аж. Тиймээс цэвэр усны нөөц багасаж, цэвэрлэх байгууламж нь ачааллаа дийлэхээ больсон өнөө үед зайлшгүй шинэчилж найруулах ёстой гэсэн байна. Энэхүү хуульд тусгаснаар хот суурин газруудын цэвэрлэх байгууламжийн үйл ажиллагааг сайжруулах, гэр хороололд ч цэвэрлэх байгууламж бий болгох гэнэ. Учир нь, газрын хөрсийг хамгийн ихээр бохирдуулж, газар ухаж бие засах газар барьдаг. Иймд тусгайлан бэлтгэсэн жижиг хэмжээний цэвэрлэх байгууламж байх хэрэгтэй гэсэн санал гаргажээ. Саарал ус буюу ашигласан усаа ариутган цэвэрлэж дахин ашиглах туршилтыг зарим нэг хувийн байгууллагууд хийж эхэлсэн тухай онцолсон юм. Гүний цэвэр усны нөөц хязгаарлагдмал тул саарал ус хэрэглэх санал гаргасан нь дэмжигдсэн ажээ. Цаашид дан ганц гүний ус ашиглах бус гадаргын усны нөөцтэй болох нь чухал гэсэн байр суурьт хүрчээ. Энэ асуудлыг судлах, хуулийн төсөл дээр ажиллах зорилгоор таван гишүүний бүрэлдэхүүнтэй ажлын хэсэг байгуулж УИХ-ын гишүүн Д.Ганхуягаар ахлуулсан байна.