Өнгөрөгч 2014 он хүйтэн дайн дууссанаас хойших хамгийн их цус асгаруулсан жил боллоо. Ийм дүгнэлтийг  Шведийн Упсалийн их сургуулийн эрдэмтэд гаргажээ.  Дүрвэгсэдийн тоо бараг 60 саяд хүрчээ.  Үүний хагас нь хүүхдүүд.

Зэвсэгт мөргөлдөөний тоо рекорд тогтоож, Хоёрдугаар дайны үеийнхтэй ойролцоо тооны дүрвэгсэд гэр орноо орхин явжээ. Энэ тухай НҮБ-ын Дүрвэгсэдийн асуудал хариуцсан байгууллага UNHCR-ийн тайланд бичжээ. 

2014 онд 27 газарт 40 зэвсэгт мөргөлдөөн гарсан байна. Ийм тоо 1999 оноос хойш гараагүй. Зэвсэгт мөргөлдөөнөөр амиа алдсан хүний тоо 100 мянгаас давав. 

Энгийн иргэд хамгийн ихээр амиа алдсан улс нь Сири болов. Афганистан, Ирак, Нигери, Украйн зэрэг улсад зэвсгийн хэрэглээний түвшин эрс өсчээ. Ирак, Афганистан, Нигерид зэвсэгт тэмцэл ширүүсч, Украйн тэргүүтэй зарим газарт цоо шинэ мөргөлдөөнүүд үүсэв.

Гэхдээ “зэвсэгт мөргөлдөөн” гэж юуг хэлэх вэ? Хэрэв доод тал нь 25 хүн амь үрэгдвэл зэвсэгт мөргөлдөөн гэнэ. Харин 1000-д хүрвэл дайн болно. Энэ тодорхойлолтоор өнгөрсөн онд дэлхийд 11 дайн болжээ. Өөрөөр хэлбэл 2013 онтой харьцуулахад 5 дайн шинээр үүсчээ. 

40 мөргөлдөөн болсны 39 нь тухайн улсын дотоодод өрнөсөн, 13-т нь байлдагч талууд “гуравдагч” орноос тусламж авсан.  Түүнээс гадна олон оролцогчтой мөргөлдөөнүүд ихэссэн нь түгшүүр төрүүлж байна. 

АНУ дөрвөн мөргөлдөөнд хөндлөнгөөс оролцож, ОХУ, Иордани, Их Британи, Бельги, Франц тус бүр гурван мөргөлдөөнд “хошуу дүржээ”.

Сирид 50 мянга гаруй хүн амиа алдсан нь үлдсэн 39 мөргөлдөөний нийт золиосоос илүү гарч байна. Ирак, Афганистанд 12 000, Украйнд 3500, Өмнөд Суданд 1600 хүн амиа алджээ. Харин гэгээтэй нэг мэдээ нь 2014 онд 10 энхийн гэрээ байгуулагдсан нь 2013 оноос илүү гарсан үзүүлэлт юм. Филиппин, Колумбид олон жил үргэлжилж буй мөргөлдөөнд энхийн гэрээ байгуулагдсан нь хонгилын үзүүрт гэрэл харагдав.