Үдийн цай хөтөлбөр нэг хүүхдийн 600 төгрөгөөр тооцдог бөгөөд энэ нь арван жилийн өмнө баталсан тооцоолол.

Гэвч өнөөдөр энэ мөнгөөр хүүхэд авах ёстой илчлэгийн хэмжээгээ авч чадахгүй байна гэдгийг НМХГ-аас хэлж байна. Энэ үнийн дүнг нэмэгдүүлэхээр санал гаргаад байгаа ч эргээд халуун хоолоор үйлчлэх хоолны газаргүй сургуулиуд байна гэдгийг бас онцолж байна. “Үдийн цай” хөтөлбөрийн хэрэгжилтэд хийсэн хяналт, шалгалтын ажлаа НМХГ-ын Эрүүл мэнд, боловсрол соёлын хяналтын хэлтсийн дарга Д.Цэнд-Аюуш, Эрүүл ахуй, халдвар хамгааллын ахлах байцаагч М.Нэргүй нар танилцуулсан юм.

Шалгалтад ерөнхий боловсролын төрийн өмчийн 120 сургууль, тэдгээрийн  дэргэдэх 129 хоолны газар хамруулжээ. Цайны газруудын 74.78 хувь нь ажлын байранд мэргэжлийн байгууллагын дүгнэлт гаргуулсан, 75.6 хувь нь хүнсний бүтээгдэхүүний нийц зохицол хангасан цэстэй, 54.6 хувь нь үдийн цайгаар авбал зохих үндсэн шимт бодис болон илчлэг хангасан хоол хүнсээр үйлчилдэг байна. Өөрөөр хэлбэл үлдсэн 45.4 хувь нь хүүхдэд илчлэг хангалттай бус хоолоор үйлчилж байна гэсэн үг.

Хяналт, шалгалтаар илэрсэн нийтлэг зөрчлүүдийг дурдвал мэргэжлийн хяналтын байгууллагын шаардлага хангасан эсэх талаар дүгнэлтгүй үйл ажиллагаа явуулсан.

Цайны газрыг технологийн  урсгалын  дагуу зөв зохион  байгуулаагүй, бэлтгэлийн  өрөө,  агуулах,  ажилчдын  хувцас  солих өрөөгүй. Мөн түүхий эд, хүнсний бүтээгдэхүүний гарал үүсэл, чанар, аюулгүй байдлын гэрчилгээ, шинжилгээний дүн, бэлтгэн нийлүүлэгчтэй хийсэн гэрээ зэргийг бүрэн бүрдүүлээгүй гэх мэт зөрчлүүд илэрчээ. Шалгалтад хамрагдсан сургуулиудын 35.4 хувь нь үдийн цайгаар авбал зохих үндсэн шимт бодисыг тооцохгүй үйл ажиллагаагаа явуулж байжээ.

М.АМАРЖАРГАЛ