Н.Наранбаатар: Уртын ээлжээр ажиллах ажилтны нэг ээлжинд ажиллах, амрах хугацаа 14/14 хоног байна

2021.06.24

Н.Наранбаатар: Уртын ээлжээр ажиллах ажилтны нэг ээлжинд ажиллах, амрах хугацаа 14/14 хоног байна

Өнөөдрийн /2021,6,24/ УИХ-ын чуулганы нэгдсэн хуралдаанаар Хөдөлмөрийн тухай хуулийн эцсийн хэлэлцүүлгийг хийлээ.Уг хуулийн зохицуулалтаар Уртын ээлжээр ажиллах ажилтны нэг ээлжид ажил үүрэг гүйцэтгэх хугацаа 14 хоног, амрах хугацаа 14 хоног байхаар тусгагдаж батлагдлаа.

УИХ-ын гишүүн Н.Наранбаатар Хөдөлмөрийн тухай хуульд дээрх өөрчлөлтийг хуульд тусгуулахаар саналаа илэрхийлж байсан нь ийнхүү биеллээ олж батлагдсан юм.

Н.Наранбаатар гишүүн уртын ээлжээр ажиллаж хүмүүс хэрхэн ажиллах талаар Хөдөлмөрийн хуульд ямар заалт орсон талаар доорх мэдээллийг бичжээ.

92 дугаар зүйл. Уртын ээлжээр ажиллуулах
92.1. Ажилтныг алслагдмал байнга оршин суугаа газраас нь өөр, алслагдсан газар байрлуулж ажил үүрэг гүйцэтгүүлэхээр уул уурхай, олборлох салбарын ажил олгогч уртын ээлжээр ажиллуулах горим хэрэглэж болно.
92.2. Энэ хуулийн 92.1-д заасан горимоор үйл ажиллагаа явуулж байгаа ажил олгогчид үйлчилгээ үзүүлж байгаа аж ахуйн нэгж, байгууллага тухайн байршилд уг горимыг хэрэглэж болно.
92.3. Уртын ээлжээр ажиллах ажилтны ажлын өдрийн үргэлжлэл 12 цагаас илүүгүй байх бөгөөд энэ хуулийн 87 дугаар зүйлийг баримтлан энэ хуулийн 109.1-д заасны дагуу илүү цагийг тооцож нэмэгдэл хөлс олгоно.
92.4. Уртын ээлжээр ажиллах ажилтны нэг ээлжид ажил үүрэг гүйцэтгэх хугацаа 14 хоног, амрах хугацаа 14 хоног байна.
92.5. Энэ хуулийн 92.4-т заасан хугацааг багасгах тохиолдолд ажил үүрэг гүйцэтгэх, амрах хугацаа нь тэнцүү байхаар ажил олгогч, ажилтны төлөөлөгч харилцан тохиролцон хамтын гэрээгээр тогтоож болно.
92.6. Уртын ээлж эхлэх болон дуусахад ажил олгогч хөдөлмөрийн дотоод журмаар тогтоосон байршил бүхий газраас ажилтныг ажлын байранд хүргэх, буцаах хугацааг ажилласан цагт тооцох бөгөөд энэ хугацаанд ажил олгогчоос хамаарахгүй шалтгаанаар саатсан хугацааг оруулахгүй.
92.7. Уртын ээлжээр ажиллах ажилтны энэ хуулийн 92.6-д заасан байршил бүхий газраас ажилдаа ирэх, буцах зардлыг ажил олгогч хариуцна.
92.8. Уртын ээлжээр ажиллах ажилтны ажил, амралтын цагийн горим, уртын ээлжээр ажилласны нэмэгдэл зэргийг хамтын гэрээ, салбарын хамтын хэлэлцээрээр тогтооно.
92.9. Ажил олгогч энэ хуулийн 80.5-д заасны дагуу ажилтныг ажиллуулаагүй бол хөдөлмөрийн дотоод журмаар тогтоосон байршилд хүргэж өгнө.
92.10. Насанд хүрээгүй хүнийг уртын ээлжээр ажиллуулахыг хориглоно.