Тэрээр НДЭЗНК-ын Гүйцэтгэх нарийн бичгийн дарга Армида Сальсия Алисжабанад манай  улсад стратегийн дүн шинжилгээ хийх, бодлогын санал боловсруулах, техникийн хамтын ажиллагаа хөгжүүлэх замаар дэмжлэг үзүүлж ирсэнд Монгол Улсын Засгийн газрын нэрийн өмнөөс талархал илэрхийллээ.

Бүс нутгийн далайд гарцгүй хөгжиж буй улсуудын холболтыг сайжруулах чиглэлд НҮБ-ын АНДЭЗНК дорвитой нэмэр оруулж байгаа. Цахим хөгжил, харилцаа холбооны сайдын үүрэг гүйцэтгэгчийн хувьд мэдээлэл, холбооны технологийн хөгжил нь далайд гарцгүй улсуудын худалдааны түншүүдтэй хүрээгээ тэлэх, шинэ зах зээлд нэвтрэх, хөгжлийн шинэ гарц болох өндөр ач холбогдолтойг онцолж, энэ чиглэлээр хамтран ажиллах сонирхолтой байгаагаа илэрхийллээ.

Далайд гарцгүй хөгжиж буй улсууд цахим болон мэдээллийн харилцааны технологийг нэвтрүүлснээр өөрсдийн худалдааны холболтыг сайжруулах, цар тахлын дараах эдийн засгийн сэргэлтийг дэмжих шинэ суваг гарцтай болно.

Энэ чиглэлд гишүүн улсууд, тэр дундаа Монгол Улсад дэмжлэг үзүүлж ажиллахад бэлэн байгаа гэж НҮБ-ын АНДЭЗНК-ын Гүйцэтгэх нарийн бичгийн дарга Армида Сальсия Алисжабана мэдэгдэв.

Монгол Улсын Засгийн газраас “Цахим Монгол” хөтөлбөр хэрэгжүүлж, Цахим хөгжил, харилцаа холбооны яам байгуулсанд Гүйцэтгэх нарийн бичгийн дарга Армида Сальсия Алисжабана баяр хүргэж, энэ оны 9 дүгээр сард болох НҮБ-ын АНДЭЗНК-ын Мэдээлэл, харилцаа холбооны технологи, Шинжлэх ухаан, Технологи, инновацын хорооны 4 дүгээр уулзалтад Монгол Улс идэвхтэй оролцоно хэмээн найдаж буйгаа илэрхийлсэн юм.