Хүнс, хөдөө аж ахуй, хөнгөн үйлдвэрийн сайд Ж.Энхбаяр, ХХААХҮ-ийн яамны Бодлого төлөвлөлтийн дарга Ц.Болорчулуун, Хөнгөн үйлдвэрийн бодлогын хэрэгжилтийг зохицуулах газрын дарга М.Дондогдорж, Гадаад хамтын ажиллагааны хэлтсийн дарга Э.Анар нар ОХУ-аас Монгол Улсад суугаа Худалдааны төлөөлөгч Васильев Максим Викторович, ОХУ-ын Аж үйлдвэр, худалдааны яамны Хөнгөн үйлдвэр, ойн аж ахуйн газрын Орлогч дарга Бобылева Ксения Владимировна, “Аурус кашемир” ХХК-ийн үүсгэн байгуулагч Глазырин Александр Сергеевич нарыг өнөөдөр /2025.02.12/ хүлээн авч уулзав.

Сайд Ж.Энхбаяр “Бид эдийн засгаа төрөлжүүлэх, уул уурхайн бус экспортод чиглэсэн үйлдвэрлэлийг дэмжих бодлогыг баримтлан ажиллаж байна. Ялангуяа малын гаралтай түүхий эдийг боловсруулах үйлдвэрлэлийг дэмжих зорилгоор Монгол Улсын Ерөнхийлөгчийн санаачилгаар "Цагаан алт" Үндэсний хөдөлгөөнийг эхлүүлсэн. Ингэснээр салбарын үйлдвэрлэл, борлуулалт, экспортыг нэмэгдүүлэх, зах зээлийг тэлэх арга хэмжээг үр дүнд хүрнэ гэж үзэж байгаа” гэдгийг тодотголоо.

“Аурус кашемир” ХХК-ийн үүсгэн байгуулагч Глазырин Александр Сергеевич “Аурус коллекшн” нь гутал, тавилга, аксессуар болон арьс, ширэн эдлэл үйлдвэрлэхийг зорьж байна. Тиймээс монгол малын гаралтай түүхий эд болох арьс шир, ноос, ноолуурыг ашиглан шилмэл брэндийн хувцас, цүнх, гутал үйлдвэрлэх боломжтой гэж үзэж байгаа гэдгээ илэрхийллээ.

Энэ хүрээнд технологи, дизайн, нийгмийн хариуцлагыг уялдуулан цогцлоосон бүх ажилтнуудад таатай орчныг бүрдүүлсэн инновацлаг цогцолбор төв болгохыг зорьж байгаа аж.

ХХААХҮ-ийн сайд Ж.Энхбаяр ОХУ-ын төлөөлөгчдийн хүлээн авч уулзав