Энхболд.М 2017.05.03 | Сайт: Vip76.mn

МАН-аас М.Энхболд 85,7 хувийн саналаар Ц.Нямдоржийг "бут цохиж", Ерөнхийлөгчид нэр дэвшихээр боллоо

МАН-аас М.Энхболд 85,7 хувийн саналаар Ц.Нямдоржийг "бут цохиж", Ерөнхийлөгчид нэр дэвшихээр боллоо
УИХ-ын дарга, МАН-ын дарга М.Энхболд

МАН VIII бага хурлаа хийж, хоёр асуудал хэлэлцэхээр төлөвлөснөөс үдээс өмнөх хурлаараа Монгол Улсын Ерөнхийлөгчийн 2017 оны сонгуульд нэр дэвшигчээ тодрууллаа.  

МАН-аас Ерөнхийлөгчийн сонгуульд УИХ-ын дарга, МАН-ын дарга М.Энхболд, УИХ-ын дэд дарга Ц.Нямдорж нар нэр дэвшихээр өрсөлдөв. 

Үнэндээ УИХ-ын гишүүн Ө.Энхтүвшин, Батлан хамгаалахын сайд Б.Бат-Эрдэнэ, Шадар сайд У.Хүрэлсүх нар ч намын гишүүдийн олонхийн саналаар нэр дэвшигчдийн тоонд багтсан ч өөрсдөө нэрээ татжээ. 

Нэр дэвшигчийг тодруулах нууц санал хураалтад МАН-ын бага хурлын 310 гишүүн оролцож, гишүүдийн 85,7 хувийн саналаар М.Энхболд 2017 оны Ерөнхийлөгчийн сонгуульд нэр дэвшихээр боллоо. 

М.Энхболд 2017 оны Ерөнхийлөгчийн сонгуульд "Хамтдаа зүтгэе-Нэгдмэл хүч", "Бүтэн Монгол-Бүрэн хариуцлага" гэсэн уриатайгаар өрсөлдөх бололтой. 

Яг одоо Ерөнхийлөгчийн сонгуульд нэр дэвшигчийн мөрийн хөтөлбөрийг хэлэлцэж байна. 

М.Энхболд нь 1999 оноос Нийслэлийн Засаг дарга бөгөөд Улаанбаатар хотын захирагчаар 6 жил ажиллаж,  улмаар 2005 онд УИХ-д сонгогдсоноос хойш тасралтгүй 4 дэх удаагаа УИХ-ын гишүүнээр ажиллаж байгаа туршлагатай парламентч юм. 

Тэрээр 2005-2016 оны хооронд МАХН-ын дарга, Монгол Улсын Ерөнхий сайд, Монгол Улсын Засгийн газрын гишүүн, Монгол Улсын Шадар сайд, УИХ-ын дэд дарга зэрэг нам, улс төрийн өндөр албан тушаалыг ээлж дараалан хашсаар ирэв. 2013 оноос МАН-ын дарга, 2016 оноос УИХ-ын даргаар ажиллаж байна. 

МАН-ын VIII бага хурлын үеэр

Сэтгүүлч

vip76.mn Г.Мөнхтуяа munkhtuya@vip76.mn