23,2 км үргэлжлэх "Шинэ тойрог зам" 4 хувилбараар төлөвлөгдлөө
Улаанбаатар хотын "Шинэ тойрог зам" төслийн замын трасс урьдчилсан байдлаар гараад байгаа тул газар чөлөөлөлтийн асуудлаар холбогдох албаныхан Хотын даргад өчигдөр /2025.04.01/ танилцууллаа.
Улаанбаатар хотын Шинэ тойрог зам төслийн 23,2 км үргэлжлэх авто замыг дөрвөн хувилбартай боловсруулжээ. Урдьчилсан байдлаар Шинэ тойрог зам нь баруун талдаа Туулын хурдны замтай, зүүн талдаа Баянзүрхийн гүүр болон Төв аймаг руу туннелиэр холбогдох аж. Дээрх бүх хувилбарт газар чөлөөлөх нөлөөллийн тооцооллыг гаргаад байна.
Замын ТЭЗҮ-ийг боловсруулж, зөвлөх үйлчилгээ үзүүлж буй "Си Эс Си И Айком консалтантс" ХХК нь БНХАУ-ын Шинжлэх ухааны академитай хамтарч байгай бөгөөд ирэх зургадугаар сард ТЭЗҮ-ийг эцэслэн боловсруулж, холбогдох мэргэжлийн зөвлөлүүдээр хэлэлцүүлэхээр төлөвлөжээ.
Шинэ тойрог зам 6 эгнээтэй баригдахаар төлөвлөгджээ.
Хотын дарга Х.Нямбаатар "Яармагаас Станц руу баригдсан замаас Хархорин худалдааны төв чиглэлд шинэ тойрог замын баруун эргэлтийн цэг байна. Урд талынх нь төмөр зам дээгүүр гүүрэн байгууламж барьснаар Барс-2 зах, Энхтайвны өргөн чөлөөгөөр гүүрээр давж Нэгдүгээр хорооллын ардын дэнж буюу Содон хороололтой холбогдох босоо чиглэлтэй. Цааш Ханын материал, Баянхошуу хүртэл шинэ тойрог зам үргэлжилнэ.
Шинэ тойрог зам төслийн ТЭЗҮ-ийг боловсруулсан компаниас гаргасан трассын дагуу Яармагаар Нэгдүгээр хороолол хүртэл газар чөлөөлөлтийн нөлөөлөл харьцангуй бага. Үерийн хамгаалалтын далан дотор гүүрэн байгууламжуудын суурь багана суурилагдах тул зарим айл газар чөлөөлөлтийн нөлөөлөлд өртөх хувилбар бий.
Шар шаврын Найрамдал орд, Баянхошууны тойргийн хажуугаар тавигдах тойрог замын нэгдүгээр хувилбар, 23,2 км урттай. Тойрог замын баруун хэсгийн туннель 3 км үргэлжилэх бөгөөд Баянхошууны наймдугаар хорооны нутаг дэвсгэрээс эхэлж, Самбалхүндэв уулын хойд бэлд төгсөнө.
Тойрог болон Туулын хурдны замтай холбогдох эргэлтүүдийг хийснээр хотын нэгээс нөгөө зах хүрэхэд 10 минут хүрэх тооцоолол гарсан. Уг 2 ажлыг төлөвлөсөн хугацаандаа ашиглалтад оруулбал замын түгжрэлийг 50-аас илүү хувиар бууруулах боломжтой.
Трассуудын эргэлтийн цэгийг тодорхойлох ажил хийгдэж байгаа. Давхар замын эргэлт, тойрох хэсгүүдийг ТЭЗҮ-д нарийн тусгах хэрэгтэй" гэлээ.
Шинэ тойрог замын трасс Яармагийн Эрчим хүчний гудамжаас эхэлж Нэгдүгээр хорооллын арын дэнж, Ханын материалын хойд хэсэг буюу Ган хийцийн тоосгоны хуучин үйлдвэрийн Сонгинохайрхан дүүргийн 8-р хорооны нутаг дэвсгэрээс Чингэлтэй дүүргийн 21-р хорооны заагт 3 км туннель зургаан эгнээтэй явган хүний орц, гарцтай иж бүрэн төлөвлөгдөнө.
Зүүн талдаа ШШГЕГ-ын харьяа 407-р хорих ангийн урд Ганц худгийн замын эргэх хэсэг болон "Да хүрээ" авто худалдааны төвийн уулзвараас гүүрэн байгууламжаар буюу хоёр түвшний авто замаар зорчиж, Туулын хурдны замтай шууд холбогдоно. "Жанжин клуб" соёлын ордон орчимд өндөр барилгууд олон, газар чөлөөлөлтийн төвөгшил их учраас мөн гүүрэн байгууламж үргэлжилж, Туулан хурдны зам руу холбогдох юм байна.
Газар чөлөөлөлтийн нөлөөлөл бага, гүйцэтгэх ажлын зардлыг хэмнэсэн, Дамбадаржаа, Сэлбэ, Шархад, Амгалан дэд төвийн ачааллыг хуваалцах байдлаар трассын төлөвлөлтүүд хийгджээ.
