УИХ-ын дарга Д.Амарбаясгалангийн урилгаар Бүгд Найрамдах Солонгос Улсын Үндэсний Ассемблейн дарга Ү Вон Шиг, түүний гэргий Шин Гён Хэ, болон Үндэсний Ассамблейн гишүүн Со Сам Сог, Ку Мин Жон, Ким Сан Үг тэргүүтэй албаны хүмүүс манай улсад албан ёсны айлчлал хийж байна.

УИХ-ын П.Батчимэг Монгол-БНСУ-ын парламентын бүлгийн дэд даргын хувьд энэхүү айчлалд бүлгэмийн дарга, гишүүдийн хамт өндөр ач холбогдол өгч оролцож байна.

Энэ онд Монгол Улс, БНСУ хооронд дипломат харилцаа тогтоосны 35 жилийн ой тохиож байгаа бөгөөд тус айлчлал нь “Стратегийн түншлэл”-ийн харилцаа, хамтын ажиллагааг гүнзгийрүүлэн бэхжүүлэхэд чухал ач холбогдолтой юм.

Монгол Улсын УИХ-ын дарга Д.Амарбаясгалан болон БНСУ-ын Үндэсний Ассамблейн дарга Ү Вон Шиг нарын хооронд болсон албан ёсны уулзалтын үеэр хэд хэдэн асуудлаар санал солилцож, хоёр орны парламентын төвшинд анхаарч ажиллахаар боллоо.

Тухайлбал, УИХ-ын дарга Д.Амарбаясгалангийн зүгээс дараах асуудлуудад онцгойлон анхаарал хандуулахыг хүслээ.

Үүнд:

МУ-ын иргэдийг БНСУ-ын хил дээрээс тодорхой шалтгаангүйгээр буцааж санхүү, сэтгэл санааны хувьд хохироож байгаа;
БНСУ-д ажиллаж амьдарч байгаа Монгол улсын иргэдийн аюулгүй байдалд анхаарч ажиллах талаар;
БНСУ-ын Засгийн газрын хөнгөлөлттэй зээлээр 10 аймгийн төвд ДЦС барих ажил удаашралтай байгаа

Харин БНСУ-ын Үндэсний Ассемблейн дарга Ү Вон Шигийн зүгээс 10 аймагт ДЦС барих төслийн ажил удааширсан шалтгаан нөхцөлийг судалж, онцгой анхаарал хандуулж ажиллахаа хэлэхийн зэрэгцээ, БНСУ-аас манай улсад аялал жуулчлалаар ирж байгаа иргэдийн визний асуудал болон тэдний аюулгүй байдалд анхаарч байгаад талархал илэрхийлж, УИХ-ын 2024 оны ээлжит сонгуулийн үр дүнд шинээр бүрдсэн ардчилсан парламентын 25.4 хувийг эмэгтэй гишүүд эзэлж байгааг улс төр дэх эмэгтэйчүүдийн тэгш эрхийг хангах, бэхжүүлэх чиглэлд анхаарсан сайн жишиг болсныг онцолсон юм.

Мөн БНСУ-д эрүүл мэндийн үйлчилгээ авахаар зорчих монгол улсын иргэдэд визний таатай нөхцөлийг бүрдүүлэх тал дээр анхаарна гэдгээ илэрхийлсэн.

Айлчлалын хүрээнд хоёр улс цаашид мэдээллийн технологи, оюун ухааны салбар, уур амьсгалын өөрчлөлтийн чиглэлд хамтарч ажиллах боломжтойг илэрхийллээ.

БНСУ эрүүл мэндийн үйлчилгээ авахаар зорчих монгол иргэдэд визний таатай нөхцөлийг бүрдүүлнэ гэв