Байгаль орчин, уур амьсгалын өөрчлөлтийн яамны дэмжлэгтэйгээр Зориг Сан ТББ-ын “Залуу Манлайлал Хөтөлбөр” (YLP)-ийн оролцогчдын санаачилсан “Junior Climate Champions” төслийн хүрээнд “Эко Сургууль 2025” уралдаан улсын хэмжээнд амжилттай зохион байгууллаа.

Энэхүү уралдаан нь уур амьсгалын өөрчлөлт, байгаль орчны тулгамдсан асуудлуудыг шийдвэрлэхэд залуу үеийн оролцоог дэмжих, сургуулийн сурагчдын бүтээлч санаачилга, манлайллыг хөгжүүлэх зорилготой юм. Уралдаанд Монгол Улсын өнцөг булан бүрээс 75 сургуулийн 2000 гаруй сурагч идэвхтэй оролцож, байгаль хамгаалах чиглэлээр санаачилга, нөлөөлөл, олон нийтийн оролцооны үр дүнгээрээ өрсөлдөөн, туршлага солилцлоо.

Оролцогч сургуулиудын клубүүд сургуулийн орчиндоо болон орон нутагтаа байгаль орчныг хамгаалах бодит ажлуудыг хэрэгжүүлж, олон нийтийг уриалан оролцуулсан нь онцлох амжилт болсон бөгөөд тэдний хүчин чармайлт нь залуу үеийнхнийг байгаль орчны манлайлагчид гэдгийг тод харууллаа.

Уралдааны тэргүүн байрын шагналыг дараах клубүүд хүртлээ:

• Шилдэг оролцоотой клуб: Хэнтий аймгийн Тэмүжин сургуулийн “Мөнгөн СУСУ”
• Шилдэг санаачлагч клуб: Өвөрхангай аймгийн Орхон сургуулийн “Байгалийн хүүхдүүд”
• Шилдэг нөлөөлөгч клуб: Орчлон олон улсын сургуулийн “Ego Cycle & Ecois”

“Эко Сургууль 2025” уралдаан нь залуу үеийнхний байгаль орчныг хамгаалах, уур амьсгалын өөрчлөлттэй тэмцэх үйлсэд оруулж буй хувь нэмрийг онцлон харууллаа. Оролцогчдын санаачилга, хамтын ажиллагаа нь ногоон ирээдүйг бүтээхэд чухал алхам болж байна.
Ногоон ирээдүйн төлөө хамтдаа! Байгаль орчин, уур амьсгалын өөрчлөлтийн яам ирээдүйд ч ийм санаачилгыг дэмжиж, залуу үеийн манлайллыг хөгжүүлэхэд хувь нэмрээ оруулна.