Төр засаг нь бужигнаж, дараагийн Ерөнхий сайдаа томилох үйл явц ид өрнөж байна. Үүнээс улбаалж УИХ-ын үндсэн үйл ажиллагаа буюу хууль хэлэлцэх үйл явц хүлээгдэж, шийдлээ хүлээж буй олон олон ажлууд хойшилсоор буй.

Дэлхийн эдийн засгийн гол тоглогчдын хооронд үүсээд буй “Татварын дайн”-ы нөлөөгөөр нүүрсний үнэ огцом унаж Монгол Улсад эдийн засгийн аюул нүүрлээд байгаа энэ цаг үед эдийн засагч, УИХ-ын гишүүн Б.Найдалаа үндсэн 3 зүйл дээр анхаарах шаардлагатайг онцолж байна.

Нэг.

Одоогийн томилогдох Засгийн газар гадна дотны хөрөнгө оруулагчдынхаа улс төр нь тогтвортой, засаг нь бужигнахгүй хөрөнгө оруулж болох юм байна гэсэн итгэлийг алдахгүйгээр яаралтай Засгаа байгуулаад тэр тал руугаа далайцтай ажиллах ёстой

Хоёр.

Бизнес хийхэд зөвшөөрлөөс эхлэн татвар, нийгмийн даатгалын өөрчлөлттэй холбоотой эдийн засгаа төрөлжүүлэх ажлуудаа шинэ Засгийн газар онцгой анхаарч ажиллах хэрэгтэй байна. Зарим шаардлагагүй зохицуулалт, журмыг үгүй хийж, иргэд орлого олох боломжийг бүрдүүлэх ёстой.

Гурав.

14 мега төслийг хэрэгжүүлэх нь зөв. Гэхдээ эрэмбэлэх шаардлагатай. Аль нь хамгийн хэрэгтэй юм, ялангуяа эдийн засаг ингэж хүнд байгаа үед гэж тооцоод жагсаалт гаргах хэрэгтэй. Энэ дотор гарцаагүй нэг зүйл бол эрчим хүчний реформ. Төсвийн сахилга батыг сахих ёстой.

Монгол Улсын одоогийн эдийн засгийн суурь нь эрчим хүч

10-аад хоногийн өмнө ТЭЦ-3 дээр ноцтой осол гарч эрдэнэт хүний амь эндсэн. Энэ осол нь яаралтай арга хэмжээ авахгүй бол өвөл болоход дулааны хангамж хүрэлцэхгүй хөлдөх аюул үүсээд байгааг албаны хүмүүс сануулсаар байгаа. Гэвч Эрчим хүчний реформ бодит байдал дээр үнэ тариф нэмэхээс өөрөөр хийгдсэн зүйл үгүй гэсэн шүүмжлэлийг бий болгоод байна.

Энэ тухайд, энэ бол үнэ нэмээд ашиг олоод байгаа биш, зөвхөн алдагдалгүй байх эхний нөхцөлийг л бүрдүүлж байгаа юм. Араас нь харин хурдан хийх ёстой ажлууд байгаа. Засаглал, менежмент тааруу байгаа болохоор осол аваар гарч, үргүй зардал байсаар байгаа юм. Бас хамгийн чухал нь хөрөнгө оруулалт. Нэмж эх үүсвэр, цахилгаан станц барихгүй байхад тогоо таслахгүй гээд яах юм. Дээр нь цахилгаан байж байж жижиг, том үйлдвэрүүд хөгжинө. Жижигхэн ТҮЦ ажиллуулахад хүртэл цахилгаан хэрэгтэй. Ноднин төсөв хэлэлцэж байхад би хэлж л байсан. Эрчим хүч, соёлын салбар хоёр яг ижилхэн төсөвтэй байгаад байгаа юм. Соёлын салбар чухал. Гэхдээ өнөөдөр бидэнд хамгийн чухал, эдийн засгийг босгох, энэ улс орныг өөд нь татах салбар нь эрчим хүч. Тиймээс зарим салбарын хөрөнгө оруулалтыг тэвчиж байгаад ч хамаагүй эрчим хүч рүү хөрөнгө оруулах хэрэгтэй. Ерөнхий сайд хэн ч болсон эрчим хүчийг нэгдүгээр асуудал болгож анхаарах ёстой хэмээн УИХ-ын эдийн засагч гишүүн Б.Найдалаа хэлэв.

Монгол Улс үйлдвэрлэгч орон болохын төлөө төрийн бодлого чиглэж, Засаг нь ажиллаж байх ёстой. Зөвхөн нүүрснээс хамааралтай эдийн засагтай орон байгаа нь өнөөдрийн нөхцөлийн үндэс болсон. Алдагдалгүй төсөл баталж, харьцааг нь “0”-д дөхүүлэх биш юунд зарцуулж, ямар үр дүнд хүргэж байгаа нь чухал юм. Эдийн засгийн ороо бусгаа энэ цаг үед том том төслүүдээ хийж болох ч үр ашиггүй бол эрэмбийн хойгуурт жагсааж, яг одоо тулгамдаа буй эрчим хүчний салбартаа анхаарч ажиллах нь шинээр байгуулагдаж буй Засгийн газрын эхний ажил байх нь зүйн хэрэг билээ

Сэтгүүлч

. Б.Цэцэгсүрэн