Иргэний шинэчлэгдсэн бүртгэлд хамрагдаагүй иргэдийг тухайн хүнийг бүрэн гэрчлэх баримт бичгийг үн­дэслэн шинэчилсэн бүртгэлд хамруулах юм байна. Өөрөөр хэлбэл, иргэний үнэмлэх огт авч байгаагүй улаан паспорттай, 16 нас хүрээд иргэний үнэмлэхээ аваагүй болон хоёр жилээс дээш хугацаа өнгөрсөн иргэдийг төрсний гэрчилгээ, бусад холбогдох материалыг үндэслэн шинэчилсэн бүртгэлд хамруулах аж. Ингэхдээ төрсний гэрчилгээ, улаан паспорт болон бусад холбогдох материалыг зохих ёсоор бүрдүүлж ХААТР 22 гэдэг тусгай маягт бөг­лөх учиртай. Энэхүү маягтынхаа мэдээллийг иргэний үнэмлэхийн санд хадгалуулснаар, таны мэдээлэл тусгай программд орж, улмаар зураг­тай лавлагаа авна. Үүнийг үндэслэн иргэний шинэчилсэн бүтгэлд хам­раг­дана.

Мөн хөдөө орон нутгаас шилжин ирсэн ирсэн иргэд бичиг баримтаа гээгдүүлээд, дахин авч чадаагүйгээс шинэчлэгдсэн бүртгэлд хамрагдахгүй тохиолдол элбэг тохиолддог гэнэ. Шилжилтийн ХААТР бичигтэй бол иргэний үнэмлэх дахин авах өргөдөл анкет, нийслэлд оршин суух өргөдөл анкетыг тухайн оршин суух хороогоороо цохолт хийлгүүлэх ёстой. Үүнийгээ Нийслэлийн бүрт­гэлийн газарт хүргэн, иргэний үнэмлэх дахин олголтын өргөдөл, анкет дээр нийслэлд оршин суух хаягийг хийлгэн, зурагтай лавлагаа авч, иргэний шинэчилсэн бүртгэлд хамрагдана. Харин орон нутгаас шилжин ирсэн бичиг болох  ХААТР-аа гээсэн иргэд Нийслэлийн бүрт­гэлийн газрын архиваас хувийн хэр­гээ шүүлгэн, мэргэжилтнээр цохолт хийлгэх ёстой юм байна. Хэрэв хувийн хэрэг нь шилжин ирээгүй бол өөрийн аймгаас хасалт хийлгэх, эсвэл Нийслэлийн бүртгэлийн газарт хандаж шийдүүлэх учиртай аж.

Мөн өнгөрсөн удаагийн шинэч­лэгдсэн бүртгэлд хамрагдаагүй ир­гэдийн дунд хорих ялаар шийт­гүүлсэн, мөн орон гэргүй иргэд олон байна. Хорих ялаар шийтгүүлсэн иргэдийг холбогдох байгууллагаар нь дамжуулан бүртгэсэн ч бичиг баримт зэрэг зөрчлүүдээс үүдэн хамрагдаагүй иргэд байна. Тэднийг ар гэрийнхнээр нь дамжуулан олгох боломжтой гэнэ. Орон гэргүй иргэдийг Сонгинохайрхан дүүрэг дэх “Амьдрах ухаан” төв дээр нэгтгэсэн журмаар бүртгэхээр болсон аж.

Харин огт баримт бичиггүй болон зөрчилтэй хүмүүсийг бүрт­гэхгүй тул ийм хүмүүс зөрчлөө зайлш­гүй арилгуулсан байх ёстой гэд­гийг УБЕГ-аас сануулж байгаа юм. Харин өнгөрсөн сарын сүүлээр хэвлэлтээс гарч, иргэдийн гарт хүрэх ёстой байсан иргэний цахим үнэмлэх гуравдугаар сарын 1-нээс иргэдийн гарт хүрэх гэнэ. Цахим үнэмлэхийг 484 нэгжээр дамжуулан тараах бөгөөд ирэх дөрөвдүгээр сар гэхэд 16-гаас дээш насны иргэн бүрт хүргэсэн байхаар төлөвлөөд байна. Эхний ээлжид бид хүн амын хөдөлгөөн багатай, тогтвор суурьшилтай, иргэдийнх нь мэдээлэл цэгцэрсэн дүүргүүдээс эхлэн туршилтын журмаар олгоно. Манайд энэхүү систем анх удаа нэвтэрч байгаа тул үнэмлэх олгох хугацаанд ямар нэгэн эрсдэл гарах вий гэж сэрэмжилж байгаа вм байна. Одоогийн байдлаар нийслэл, аймгуудад ажлын хэсэг гарчээ.

Иргэний цахим үнэмлэх олгох ажлыг  Улсын бүртгэлийн ерөнхий газар дангаар хариуцан хийхэд ачаалал  үүсэх магадлал өндөртэй тул орон нутгийн засаг захиргааны нэгжүүдээр дамжуулан хамтран ажиллаж байгаа аж.