Төрийн жинхэнэ албан хаагч 2012 оны нэгдүгээр сарын нэгнээс өмнө ажлаа өгөөгүй бол нэр дэвшихгүй. Гэвч хуулийг гууль болгох дуртай төрийн жинхэнэ албан хаагч нэрийг зүүгсэд ирэх сонгуулийн бэлтгэлээ ханцуй дотроо сэмхэн хийж, сонгуулийн хуулийг илтэд зөрчих болсон. Зарим сүйхээтэй нь байгууллагынхаа ажлыг сурталчилж байна гэх нэрийн дор төрийн нэрийг ил цагаан барьж, сонгуулийн сурталчилгаа хийх явдал эх захаа алдлаа. Энэ бүхнийг зохицуулах хуулийн зохицуулалт байхгүй хэдий ч төрийн албан хаагч нэрээр ард түмний тархийг угаах явдал нь шударга сонгууль явагдах эсэхэд ч бас эргэлзээ бий болгож байгаа юм.

Хуулийн “Төрийн жинхэнэ албан хаагч сон­гуульд оролцохдоо нэг­дүгээр сарын нэгнээс өмнө ажлаа өгсөн байх ёстой” гэсэн заалтын дагуу энэ хугацаанаас хойш аж­лаа өгсөн албан хаагч сон­гуульд нэр дэвших оролдлого гаргавал түүнийг хэрхэн зохицуулах талаар СЕХ-ны ажлын хэсгийн дарга Д.Баяндүүрэнгээс тод­руулсан юм.

-Сонгуулийн тухай хуулинд сонгуульд нэр дэв­ших төрийн жинхэнэ албан хаагч 2012 оны нэгдүгээр сарын нэгнээс өмнө аж­лаасаа чөлөөлөгдсөн байх хуул­ьтай. СЕХ энэ асуудлыг ямар хуулиар зохицуулж байгаа вэ?

-Сонгуулийн тухай хуулинд тодорхой заасан бай­даг. Төрийн жинхэнэ ал­бан хаагч сонгуульд нэр дэвших бол 2012 оны нэгдүгээр сарын нэгнээс өмнө ажлаа өгсөн байх хуультай. Энэ хуулиар л зохицуулалт хийнэ. Хэрэв энэ хугацаанаас хойш ажлаа өгсөн тохиолдолд сонгуулийн хууль зөрчинө. Хууль зөрчсөн нэр дэвшигчийг сонгуульд оруулах боломжгүй.

-Ер нь нэгдүгээр сарын нэг­нээс өмнө ажлаа өгөөгүй ч сон­гуульд оролцох бодол­той төрийн жинхэнэ албан хаагч мэр сэр байгаа юм биш үү?

-Гэхдээ нэр дэвших ажил эхлээгүй байгаа болохоор хэн нь хууль зөрчиж байгааг мэдэх аргагүй.

-Нэр дэвшигчдийг хэзээ­нээс эхэлж бүртгэх вэ?

-Сонгуульд нэр дэвшигчдийг энэ сарын 19-нөөс бүртгэж эхлээд 25-ны өдөр гэхэд албан ёсоор тод­руулна. Эхлээд нэр дэв­шигчдийг нам, эвслээс тодруулсны дараа сонгуулийн хэсгийн хороод, тойргийн хороод бүртгэж эхэлнэ. Той­рогт нэр дэвшигчдийг тойр­гийн хороо, намаас нэр дэв­шигчдийг СЕХ, хэсгийн хороод бүртгэнэ.