Х.Болорчулуун гишүүний хувьд орон нутагт үйлдвэрлэл хөгжүүлэх ажилд нэлээд нухлагдсан тул ажил мэдэх хүн гэж байлаа. Харин Х.Болорчулуун гишүүн “Жижиг, дунд үйлдвэрлэлийг хөгжүүлэх дэд хорооны бүрэлдэхүүнд УИХ-ын гишүүн Б.Энх-Амгалан харьяалагдах хүсэлтэй байгаа. Хувийн хэвшилд олон жил ажилласан үйлдвэрлэлийг яаж хөгжүүлбэл хамгийн оновчтой вэ гэдгийг хамгийн сайн мэдэх хүнийх нь хувьд дэд хорооны бүрэлдэхүүнд багтаачихмаар байдаг. Боломж байна уу, наймаас дээш гишүүний бүрэлдэхүүнтэйгээр дэд хороо ажиллаж болох уу” гэж байв. УИХ-ын Эдийн засгийн байнгын хорооны дарга Б.Гарамгайбаатар “МАН-ын гишүүд аль байнгын хороонд харьяалагдах хүсэлтэйгээ албан ёсоор илэрхийлээгүй байгаа. Энэ асуудал заавал чуулганаар хэлэлцэгдэж батлагдах ёстой тул шууд байнгын хорооны төвшинд асуудлыг шийдэх боломжгүй” гэсэн юм. Тэгвэл УИХ-ын гишүүн С.Дэмбэрэл дэд хорооны даргаар сонгогдсон УИХ-ын гишүүн Х.Болорчулуунд хандан “Жижиг, дунд үйлдвэрлэлийн сан гэж байдаг, мөнгөтэй, мөнгөгүй нь мэдэгддэггүй. Түүнийг нь мэдээд өгөөч” гэдэг хүсэлт тавихад гишүүд “Мөнгөтэй бол юу гэж, мөнгөгүй бол яах нь вэ” гэж лавлав. УИХ-ын гишүүн С.Дэмбэрэл “Мөнгөтэй, мөнгөгүйг нь мэдэж байж дэд хороонд гишүүнээр үлдэх үү, гарах уу гэдгээ шийдэх гэсэн юм” хэмээн хариу барив. Мөн энэ үеэр дэд хорооны бүрэлдэхүүнээс гаръя гэвэл яадаг юм бэ гэж асуух гишүүн ч байлаа.