УИХ-ын чуулганы нэгдсэн хуралдаанаар Эрүүгийн хууль болон холбогдох бусад хуулийн төслүүдийн анхны хэлэлцүүлгийг хийж, байнгын хорооноос оруулж ирсэн 100 саналын томъёоллоор санал хураалгах байсан ч гишүүдийн ирц хангалтгүй, дээр нь чуулганы цаг завсарлах хугацаанаасаа хэтэрсэн тул хуралдааныг өндөрлүүлээд байна.

Гэхдээ ирэх долоо хоногийн мягмар, лхагва гаригийн аль нэгд зөвхөн Эрүүгийн хуулиар тусгай чуулган зарлахаар боллоо. Ийн тусгай өдөр гаргаж хэлэлцэхгүй бол 100 саналын томъёоллоор санал хураалгана гэдэг амаргүй ажил бололтой. Өнгөрсөн лхагва гаригт УИХ-ын Хууль зүйн байнгын хороо дээрх хуулийн төслийг хэлэлцэж, 100 саналаар санал хураахын тулд бүтэн өдрийн турш хуралдаж байсан юм.

Чуулганыг өндөрлүүлэхийн өмнө Эрүүгийн хуультай холбогдуулан нэр бүхий гишүүд ажлын хэсгийнхнээс дараах асуултад хариулт авлаа.

Тухайлбал, УИХ-ын гишүүн Л.Энх-Амгалан “Эрүүгийн хуулийг шинэчлэх хүрээнд эдийн засгийн гэмт хэргийг зохицуулах заалтад дэвшил гарах ёстой ч хуучнаасаа дордсон байж мэдэх тал ажиглагдаж байна. Татвар төлдөг 20 мянга гаруй аж ахуйн нэгжийн 11 мянга нь НӨАТ-ын маргаантай асуудлаар хууль хүчний байгууллагад шалгагдаж байгааг албаны эх сурвалжуудын баримт хэлдэг.

Гэтэл татвар төлөлттэй холбоотой, Нийгмийн даатгалын шимтгэл төлөхөөс зайлсхийх зэрэг аж ахуйн нэгжийн нууцлалтай холбоотой асуудлыг хариуцлагажуулаад Эрүүгийн хуульд оруулж. Зөрчлийн хуулиар зохицуулж болох зүйлийг Эрүүгийн хуульд оруулсан, УИХ-аас маш сайн Үнэт цаасны тухай хууль баталсан, энэ хуулиар зохицуулах боломжтой зүйл Эрүүгийн хуульд багтсан, Өрсөлдөөний хуулиар зохицуулах боломжтой зүйл мөн энэ хуульд багтсан зэрэг зүйл ажиглагдаж байна. Хуулийн төслийг боловсруулах шатанд бизнесийн эрх ашгийг хамгаалдаг байгууллагуудаас саналыг нь бодитой тусгаж чадсан уу” гэдгийг тодрууллаа.

Эрүүгийн хууль болон холбогдох бусад хуулийн төслүүдийг боловсруулах үүрэг бүхий ажлын хэсэгт багтаж ажиллаж байгаа УИХ-ын гишүүн Х.Тэмүүжин “Хуулийн төслийг боловсруулах шатанд УИХ-ын гишүүн С.Дэмбэрэл энэ тухай олон ярьсан. Тийм учраас монофоль тогтоох байдалтай холбоотойгоор зах зээлд давамгай байдал эзэлж, өрсөлдөөнөөс шахаж гаргаж байгааг хуульчлахаар зохицуулсан.

Санхүүгийн зах зээлтэй холбогдох асуудлын тухайд Олон улсын Мөнгө угаах гэмт хэрэгтэй тэмцэх баримт бичгийн хүрээнд хүлээсэн үүрэгтэй холбоотой. Олон улсын байгууллагаас тавьж байгаа шаардлагын хүрээнд ажиллахгүй бол гадагшаа гарч байгаа мөнгөний эргэлт дээр хяналт тавина гэж байгаа учраас энэ бол хүлээсэн үүргийн хэмжээнд хийж буй зохицуулалт.

Ер нь Эрүүгийн хуулиар авч үздэг байсан гурав, дөрвөн төрлийн саналыг хассан” гэсэн хариулт өглөө.

Тэгвэл УИХ-ын гишүүн З.Баянсэлэнгэ: Татвар төлөгчдийн эрх ашгийг хамгаалах нийгэмлэгээс ирүүлсэн бичиг болон бусад бизнесийнхний эрх ашгийг хамгаалах байгууллагаас ирүүлсэн бичигт “Банкаар хийгддэг 20 сая төгрөгөөс дээшхи гүйлгээ бүрийг хянадаг болсноос хойш бизнес эрхлэгчид Авлигатай тэмцэх газарт шалгагддаг боллоо.

Дээр нь одоо УИХ-аар хэлэлцэж байгаа Эрүүгийн хуулийн шинэчилсэн найруулгын төсөл чинь бизнесийг боомилох төсөл гэж байгаа. Хэдийгээр бид Хууль зүйн байнгын хороон дээр нэлээд ярилцсан ч бүрэн дүүрэн шийдэж чадаагүй учраас энэ заалтууд дээр анхаарахгүй бол болохгүй” гэв.

Байнгын хорооноос оруулж ирсэн зарчмын зөрүүтэй саналын томъёоллоор үргэлжлүүлэн санал хураалгах шаардлага байсан ч гишүүдийн ирц хангалтгүйгээс санал унах магадлал өндөр байсан тул хэлэлцүүлгийг түр хойшлуулж, чуулганы нэгдсэн хуралдааныг өндөрлүүлсэн юм.

Эрүүгийн хуулийг УИХ-аар тусгайлан хэлэлцэнэ