Н.Учрал: Утаатай биш ЯДУУРАЛТАЙ тэмцэх хэрэгтэй
Өнгөрсөн жилийн арван нэгдүгээр сард УИХ-ын нэгдсэн чуулганаар Агаарын бохирдлын асуудлыг хэлэлцсэн. Энэ үед УИХ-ын гишүүн Н.Учрал "Утаатай биш ЯДУУРАЛТАЙ тэмцэх хэрэгтэй" гэдэг үгийг хэлж байсан. Энэ үг өнөөдөр ч ҮНЭН бөгөөд ҮНЭ ЦЭНЭТЭЙ хэвээр байна.
Цаг агаар хүйтэрч, Улаанбаатарын утаа дэгдээд эхэлчихлээ. Энэ цаг үед Засгийн газраас утааны эсрэг дорвитой арга хэмжээ авахгүй нь гэсэн урам хугаралт иргэдийн дунд үүссэн байна.
Өнөө л ядан, зуух...шүүлтүүрээ Засгийн газар ярьсаар байгаа нь иргэдийг ийн бухимдуулахад хүргээд байгаа юм.
Харин яг нэг жилийн өмнө Н.Учрал утааны бохирдлоос гарах гарц бол яндан, зуух биш харин ядууралтай тэмцэх, цаашлаад технологийн шийдэл хайх тухай асуудал гэдгийг хэлсэн байдаг. Түүний хэлсэн үгийг эргэн санаж, доор сийрүүлье.
"Англи улсын Лондон хот 500 жилийн өмнө утаандаа баригдаж хаан нь хүртэл нас барж байсан түүхтэй, 300 жилийн өмнө Парис хот, 10 жилийн өмнө Бээжин хот бас ийм л байсан. Гэтэл Хятад улс “Ногоон Хятад бодлого” дэвшүүлээд нүүрснээс татгалзъя, бүх машинаа цахилгаан болгоё гээд цахилгаан машины үйлдвэрийн технологийг худалдаад авчихлаа. Энэ бол зоригтой алхам. Тэгэхээр бид "утаатай тэмцье" гэх нь буруу юм. Утаа чинь хөгжил шүү дээ. Хүн их оршин сууж байгаа газар буюу их хотод утаа угаасаа л бий болдог. Тиймээс БИД УТААТАЙ БИШ ЯДУУРАЛТАЙ ТЭМЦЭХ ЁСТОЙ.
Өнөөдөр 200 доллар хүрэхгүй цалин авдаг иргэддээ "нүүрс битгий түл" гэж хэлж чадахгүй шүү дээ. Харин ч миний хувьд тусламж хүссэн СХД-ийнхээ иргэдэд нүүрс аваачиж өгдөг. Яагаад гэвэл тэнд хүүхдээ хөхүүлээд сууж байгаа эмэгтэй даарахгүй байх ёстой. Тэд нүүрснээс өөр юу түлэх юм бэ? Тиймээс л энэ ядуурлыг шийдэх хамгийн чухал. Орлого нь өндөр болоод амьдрал ахуйг нь дээшилчих юм бол нүүрс түлэхгүй ээ. Ядуу байгаа учраас нүүрс түлж байгаа юм шүү дээ.
Утаатай тэмцэх биш цалин хөлсөө нэм, татвараар дарамтлахаа боль. Харин дараагийн асуудал бол ТЕХНОЛОГИ ХАЙ. Ер нь бол хашаа, байшинд яаж ч сайхан амьдарч болно. Гэр хорооллыг орон сууцанд оруулах ажлыг богино хугацаанд бид шийдэж чадахгүй. Тиймээс гэртээ 0.7 га газарт дээрээ хэрхэн цэвэр, бохирын асуудлыг шийдсэн дэд бүтцийг хэрхэн бий болгох уу гэдэг дээр анхаарал хандуул. Гуравдугаарт, бусад хотуудын жишгээр шилжилт хөдөлгөөнийг зохицуулах хэрэгтэй.
БҮСИЙН НЭМЭГДЛИЙГ БИЙ БОЛГОХ ХЭРЭГТЭЙ. Баян-Өлгий аймагт багшийн цалин хамгийн өндөр, Увс аймагт түүнээс арай бага байдаг гэх мэтчилэн хөдөө орон нутагт ажиллах бололцоог нь хангаж өгөх ёстой. Мөн Улаанбаатар хотыг 1-3 бүсэд хуваа. Ингээд бүсээс хамаараад татвар нь шатлалтай байх хэрэгтэй. Хотын захад амьдрахад таатай орчинг бий болго. Ингэж дагуул хотын жишгээр хөгжих ёстой. Тэгэхээр утаатай бус ядууралтай тэмц. Ядуурлаа шийдчихвэл утаа аяндаа байхгүй болно.
Н.Учрал гишүүний энэхүү байр суурийг Монгол улсын Ерөнхийлөгч, болон бусад УИХ-ын гишүүд ч дэмжиж буйгаа тухайн цагт хэлж байж.
Монгол улсын Ерөнхийлөгч Х.Баттулга
1.5-5 сая төгрөгөөр гэр дулаалах тухай ярьж байна. Энэ их мөнгө чинь гэр хороололд амьдарч байгаа өрхөд байхгүй. Энэ хүмүүс чинь ядуу байна. УИХ-ын гишүүн Н.Учрал, Ж.Ганбаатар гээд хэдэн гишүүд их зөв яриад байна л даа. Энэ утаагаа ажилгүйдэл ядууралтай нь хамт шийднэ. Үүнээс өөр арга байхгүй.
УИХ-ын гишүүн Ж.Ганбаатар
Хамгийн түрүүнд ядууралтай тэмцэх ёстой. Үүний тулд тогтвортой ажлын байраар ард иргэдээ хангах ёстой. Ингэж байж бид утаатай тэмцэнэ. Утаатай тэмцэхэд бид том том, мэргэн санаа олох эсвэл бусдад таалагдах шийдвэр гаргах гэж бодох хэрэггүй.
УИХ-ын гишүүн Б.Баттөмөр
Утаатай тэмцэнэ гэдэг нь ядуурлыг бууруулах олон арга хэмжээний нэг нь болж явах ёстой. Утаа бол ядууралтай шууд холбоотой. Ард иргэд ажилтай, орлоготой болох юм бол энэ утаа дагаад багасна. Тийм учраас Монголын төрийн авч хэрэгжүүлэх ёстой бодлогууд дотор ядуурлыг бууруулах арга хэмжээгээ эрчимтэй хийсэн тохиолдолд утааг багасгах боломж гарч ирэх юм.
Сэтгүүлч О.Батзаяа
