Монгол Улсын Ерөнхий сайд Л.Оюун-Эрдэнэ Монгол Улсад төрийн айлчлал хийж буй Бүгд Найрамдах Киргиз Улсын Улсын Ерөнхийлөгч С.Жапаровт өнөөдөр бараалхав.

Ерөнхий сайд Л.Оюун-Эрдэнэ Монгол, Киргиз хоёр улс өнгөрсөн 30 гаруй жилийн хугацаанд найрсаг харилцаа, хамтын ажиллагааг тогтвортой хөгжүүлж ирснийг дурдаад далайд гарцгүй, хөгжиж буй орнуудын адил төстэй талуудаа цаашид Киргиз Улстай хөгжүүлж буй харилцааг худалдаа, эдийн засгийн агуулгаар баяжуулж, хамтын ажиллагааг эрчимжүүлэхийн төлөө байгаагаа тэмдэглэв.

Монгол Улсын Засгийн газар хөрөнгө оруулалтын эрх зүйн орчныг сайжруулж, тогтвортой болгох, олон улсын жишигт нийцүүлэх зорилгоор “Хөрөнгө оруулалтын тухай хууль”-ийг шинэчлэхээр ажиллаж буй талаар дурдаж, цаашид хоёр улсын нөөц бололцоо, давуу талыг ашиглан харилцан ашигтай, бие биеэ нөхсөн хамтын ажиллагааг хөгжүүлэх, хөдөө аж ахуй, хөнгөн үйлдвэр, ногоон хөгжил, сэргээгдэх эрчим хүч, уул урухайн чиглэлээр хамтарсан төсөл, хөтөлбөр хэрэгжүүлэх, харилцан туршлага солилцох өргөн боломж байгааг Монголын тал тэмдэглэв.

Хоёр улсын харилцан ашигтай худалдаа, эдийн засгийн хамтын ажиллагааг өргөжүүлэн хөгжүүлэх хүрээнд Монгол Улсаас Киргиз Улсад мах, махан бүтээгдэхүүн, арьс шир зэрэг экспортын бараа бүтээгдэхүүн нийлүүлэх, Киргиз Улсаас жимс, жимсгэнэ, нарийн ногоо импортлох хамтын ажиллагааг бодлогоор дэмжиж хамтран ажиллах, мал эмнэлэг, хорио цээрийн байгууллагууд хоорондын хэлхээ холбоо, хамтын ажиллагааг идэвхжүүлэхээр талууд санал нэгдлээ.

Худалдаа, эдийн засаг, шинжлэх ухаан, техник, соёлын хамтын ажиллагааны Монгол, Киргизийн Засгийн газар хоорондын комиссын үйл ажиллагааг идэвхжүүлж, өнгөрсөн 2022 оны гуравдугаар сард болсон IV хуралдааны үеэр тохиролцсон зүйлсийн хэрэгжилтэд анхаарч ажиллахын төлөө буйгаа талууд илэрхийлэв.