Цалингийн урамшуулал, нэмэгдлээс орхигддог байсан цөөн салбаруудын нэг болох “Ус, цаг уур, орчны шинжилгээний салбар”-ын албан хаагчдын цалин гурван сайдын хамтарсан тушаал батлагдсаны дагуу нэмэгдэж, дундаж цалин 1.4-1.9 сая төгрөг болж өсөв.

27-н жилийн дараа "Ус цаг уур, орчны хяналт шинжилгээний салбарын төрийн үйлчилгээний албан хаагчид мэргэшлийн зэрэг олгох шалгуур үзүүлэлт, хэрэглэх журам" болон "Ус цаг уур, орчны хяналт шинжилгээний салбарын төрийн үйлчилгээний албан хаагчид ур чадварын нэмэгдэл олгох шалгуур үзүүлэлт, хэрэглэх журам"-ыг Сангийн сайд, Байгаль орчин, аялал жуулчлалын сайд болон Хөдөлмөр, Нийгмийн Хамгааллын сайд нар хамтран баталлаа.

Ингэснээр улсын хэмжээнд ус, цаг уурын салбарын 1,864 албан хаагчийн цалин дунджаар 1.2-1.6 саяас 1.4-1.9 сая төгрөг болж нэмэгдэн, нийгмийн баталгаа нь сайжирч байна.

Дархан-Уул аймгийн УЦУОШТ нь нийт 41 алба хаагч, цаг уурын инженер, техникийн ажилтнуудтай билээ.

Цаг уурчид цалингийн нэмэгдэл нь орон нутагтаа суурьшин ажиллах хүсэл тэмүүллийг нэмэгдүүлж, шаардлагатай байгаа орон тоонуудад ажиллах шинэ залуу боловсон хүчин зорин ирж ажиллана гэдэгт найдаж байгаагаа илэрхийлжээ.