Монгол Улсын Ерөнхий сайд Л.Оюун-Эрдэнэ, Сангийн сайд Б.Жавхлан, Хөдөлмөр, нийгмийн хамгааллын сайд Х.Булгантуяа нарын хамт төрийн нийтлэг үйлчилгээний алба хаагчидтай уулзлаа.

Монгол Улсын Засгийн газраас “Шинэ сэргэлтийн бодлого”-ыг хэрэгжүүлж буй. Үүнтэй уялдаж манай улсын эдийн засаг -4,6 хувиас 7,9%  болтлоо өсчээ.

Мөн боомтын сэргэлтийн ажлууд эрчимтэй өрнөж, нүүрсний экспортыг ил тод байлгах үүднээс цахимаар арилждаг болсноор далд эдийн засаг ил болж улсын төсөв анх удаа 1,1 их наядаар даван биелж, нэг хүнд ногдох дотоодын нийт бүтээгдэхүүн 5000 ам.долларт хүрээд байна. Энэ бол Шинэ сэргэлтийн бодлого”-ын үр дүн гэдгийг Ерөнхий сайд уулзалтын эхэнд онцоллоо.

Үүний дараа Хөдөлмөр, нийгмийн хамгааллын сайд Х.Булгантуяа төрийн албан хаагчдын цалингийн шинэчлэлийн талаар танилцуулав. Төрийн албанд гүйцэтгэлд суурилсан цалингийн бодлого хэрэгжүүлэхээр зорьж байна. Эрүүл мэнд, боловсролын салбар гүйцэтгэлд суурилсан цалингийн системд шилжсэнийг дурдав.

Улсын төсвийн тодотголд 986,6 тэрбум төгрөгийг төрийн албан хаагчдын цалингийн нэмэгдэлд зарцуулна. Тэр дундаа төрийн нийтлэг үйлчилгээний албан хаагчдын цалинг 26-31 хувиар нэмэгдүүлж байгааг тэрээр хэлсэн юм.

Тэгвэл төрийн нийтлэг үйлчилгээний алба хаагчдын зүгээс цалин, нийгмийн асуудлыг анхаарах шаардлагатай. Цалин байга байдгаас энэ салбарт ажиллах хүн олдохгүй байгаа талаар хэлсэн.

Тус салбарт улсын хэмжээнд 52,7 мянган хүн ажиллаж байна.

Харин Ерөнхий сайд Л.Оюун-Эрдэнэ  төрийн нийтлэг үйлчилгээний салбарыг гүйцэтгэлд суурилсан цалингийн системээр ажиллуулах, орон сууцны ипотекийн зээлд хөнгөлттэй нөхцөлөөр хамруулах боломж байгаа талаар судална гэдгийг хэллээ.