Монголын багш нарын үйлдвэрчний эвлэлийн холбооноос аравдугаар сарын 5-нд  болох Дэлхийн багш нарын өдрөөр "Багшийн цалин 1000 ам.долларт хүргэе" шаардлагын хүрээнд орон даяар ажил хаялт зарлахаар болсон талаар мэдээлсэн. 

Монгол багш нарын ҮЭХ-ны дарга Д.Мөнхбаатар "Бид 2023 оны есдүгээр сард салбарын хэлэлцээрийг эхлүүлэх тухай мэдэгдэл хүргүүлсэн. Мэдэгдлийн хугацаа аравдугаар сарын 3-нд дуусна. Хэрвээ энэ хугацаанд хэлэлцээр эхлүүлэхгүй бол багш нар аравдугаар сарын 5-нд улсын хэмжээд ажил хаялт зарлана" гэж мэдэгдээд байсан юм.

Тэгвэл БШУ-ны сайд Л.Энх-Амгалан Засгийн газрын хуралдааны дараа  "Боловсролын салбарын цалин чинь улсын төсөвтэй хамаатай биз дээ. УИХ-аар 19 их наядын төсөв баталж байгаа. 19 их наядын 5 орчим их наяд нь цалин, тэтгэвэр байдаг. Үүний 1,1 их наяд нь зөвхөн боловсролын салбарын 93 мянган ажилтнуудад зарцуулагддаг. ДНБ, эдийн засгаа хэд дахин өсгөж байж энэ асуудлыг шийднэ гэхээс биш хэн дураараа гарч ирээд "Багш нарын цалинг 1000 ам.доллар болгоно" гээд болчихгүй" хариулт өглөө.