·Нийгмийн бодлогын байнгын хорооны /2025.04.01/-ний өдрийн хурлаар Донорын тухай хуулийн хэрэгжилтийн талаарх Эрүүл мэндийн сайдын мэдээллийг сонслоо.

Хэлэлцэж буй асуудалтай холбогдуулан гишүүд асуулт асууж, саналаа хэллээ.

УИХ-ын гишүүн Ж.Чинбүрэн:

ЗГ бол хууль хэрэгжүүлэх, хуулийн заалтуудыг биелүүлэх газар шүү гэдгийг онцгойлон хэлмээр байна. Эмийн түр хороо байгуулаад тогтоолууд гаргасан. Өнгөрсөн намрын чуулганд танилцуулах ёстой байсанч тайлангаа өгсөнгүй. Хууль санаачлагч байгууллагатайгаа зэрэгцээд хууль санаачлаад явах нь чухал гэж үзэж байна уу? Ядаж байгаа хуулиудаа хэрэгжүүлчихвэл салбарын хөгжилд чухал нэмэр болно. Би өнгөрөгч 2 дугаар сарын 19-ний өдөр 2 хуульд санал авахаар төслөө явуулсан. ЭМЯ-аас хариу ирүүлээгүйг хэрхэн тайлбарлах вэ?

Өнгөрсөн хугацааны Донорын тухай хууль үүргээ маш сайн биелүүлсэн. Тухайлбал, 2008 онд Эд эс, эрхтэн шилжүүлэх харилцааг зохицуулах агентлагтай болсон Үүний үр дүнд амьгүй донор нэлээдгүй олдож, олон иргэдээ гадаад явуулж өрөнд оруулахгүйгээр эндээ хагалгаа амжилттай хийж чадсан. Дараагийн алхмууд хүлээгдээд байна. Авлагагүй өглөг буюу цусны донорын бодлогыг хэрхэн дэмжих талаар энэ хуульд тусгасан байна. Үүнийг мэргэжлийн байгууллагуудын саналыг авч, хэд хэдэн удаагийн зөвлөгөөн, хэлэлцүүлэг хийсний дүнд баталж чадсан. Дараагийн шатны алхмаа хиймээр байна. Нэгэнт амь аврагдах аргагүй бол олон хүний амь насыг аварч буян үйлдээд тэнгэрт дэвшээсэй гэсэн А.Ариунзаяа гишүүний ярьсантай санал нэг байна. Дэлхий нийт энэ чиглэл рүү орчихсон. Энэ хуулийг дэмжье. УИХ дэмжиж байгаа. Байнгын хороо ч дэмжих гээд сууж байна. Хуулийн төслөө өргөн барьчихлаа. Одоо хамтраад бодлогын том алхмуудаа хийж, хөрөнгө оруулалт, санхүүжилтийн тогтолцоогоо сайжруулъя. Эрхтэн шилжүүлэх суулгах төвийн барилгын ажил эхлээд явж байна. Бидэнд чадаж байгаа, бүтээж байгаа олон зүйл байна. Гагцхүү үүнийг бүтээж байгаа салбарын ажилчдын урмыг хугалмааргүй байна. Айдас хүйдэстэй ажиллаж болохгүй. Дараагийн хууль санаачлах тухай ярихын оронд одоо байгаа нөхцөл боломжоо ашиглаж болно. Мэргэжлийн ёс зүйн хороогоор энэ нь гэмт хэргийн шинжгүй гэдгийг тодорхойлоод өгчих л асуудал шүү дээ. Харин Донорын тухай болон Цусны донорын тухай тус тусдаа хуулиуд дээр Байнгын хорооны гишүүд бүгдээрээ хичээнгүйлэн ажиллая аа.