УИХ-ын гишүүн, УИХ-ын Нийгмийн бодлого, боловсрол, соёл, шинжлэх ухааны байнгын хорооны дарга Д.Очирбат Улаанбаатар хотноо болж буй Азийн Шинжлэх ухааны Зөвлөлийн 11 бага хуралд оролцож байгаа Азийн шинжлэх ухааны Зөвлөлийн гишүүн байгууллагуудын төлөөлөгчдийн тэргүүн нарыг өнөөдөр Төрийн ордонд хүлээн авч уулзлаа.

Д.Очирбат дарга төлөөлөгчдийн тэргүүн нарыг хүлээн авахдаа хэлсэн үгэндээ, “Азийн Шинжлэх ухааны Зөвлөлийн 11 бага хурал манай улсад болж байгаад бид баяртай байна. Энэ хурал анх удаагаа Монгол улсад болж байна гэж ойлгож байна.

Ази Номхон далайн 11 орны нэр хүнд бүхий19 шинжлэх ухааны байгууллагыг өөртөө нэгтгэсэн Азийн шинжлэх ухааны Зөвлөл байгуулагдсанаас хойшхи өнгөрсөн 10 гаруй жилийн хугацаанд Ази, Номхон далайн бүс нутгийн орнуудын тулгамдсан асуудлууд, тухайлбал олон салбарт тогтвортой хөгжлийг хангах болон эрүүл мэнд, эрчим хүч, байгаль орчны асуудлыг шийдвэрлэх арга замыг эрэлхийлэх талаар эрдэмтдийн санал дүгнэлтийг нэгтгэх, энэ үндсэн дээр тодорхой аргачлал боловсруулах талаар онцлон ажиллаж иржээ.

Энэ удаагийн хурал “Ази дахь газрын доройтол” сэдвээр болох гэж байгаа нь цаг уурын өөрчлөлттэй уялдан Ази, Номхон далайн оронд газрын доройтол эрчимтэй явагдаж байгаа үед түүнийг сааруулах арга замыг хайх талаар Ази Номхон далайн орнуудын эрдэмтэн судлаачид хамтран ярилцаж, оновчтой шийдэлд хүрэхэд чухал алхам болно гэж найдаж байна.

Өргөн уудам нутагтай Монгол орны хувьд дэлхий нийтийг хамарсан уур амьсгалын дулаарлын үр дагавар хүчтэй нөлөөлж байна. Ялангуяа цөлжилт манай орны хээрийн бүсэд ихээхэн эрчимтэй явагдаж, өвс ургамал ховордож малын бэлчээр доройтох, булаг шанд хатаж ширгэх боллоо. Монгол улсад эрдэмтдийн гаргасан тооцоогоор нийт нутаг дэвсгэрийн 72 хувь их, бага хэмжээгээр цөлжилтөнд өртсөнийг тогтоогоод байна. Иймээс та бүхний хэлэлцэх гэж байгаа асуудал Монгол Улсын хувьд цаг үеэ олсон чухал сэдэв гэж үзэж баяртай байна. Энэхүү газрын доройтол, цөлжилтөнд нөлөөлж буй хүчин зүйлийг бид уур амьсгалын дулааралтай холбохын зэрэгцээ хүний буруутай үйл ажиллагаатай салшгүй холбоотой гэж үздэг. Ийм ч учраас уул уурхайн эрчимтэй хөгжлийн үед байгаль орчноо хамгаалах, ялангуяа хүний хөгжлийг хангахад онцлон анхаарч байна.

Маргааш болох олон улсын симпиозиум дээр Монгол Улсын Шадар сайд М. Энхболд үг хэлж, манай Засгийн газрын гишүүн, Байгаль орчин аялал жуулчлалын сайд Л.Гансүх “МОНГОЛ ОРНЫ ГАЗРЫН ДОРОЙТОЛ, ЦӨЛЖИЛТТЭЙ ТЭМЦЭХ ТАЛААР ТӨРӨӨС АВЧ ХЭРЭГЖҮҮЛЖ БУЙ БОДЛОГО, АРГА ХЭМЖЭЭ” илтгэлийг тавьж хэлэлцүүлэх гэж байна.

Монгол Улсын тогтвортой хөгжлийн ирээдүй нь Оюутолгой, Таван толгой гэсэн баялгийн толгойноос бус Монгол хүний бүтээлч сэтгэгч оюуны толгойноос хамаарна. Энд шинжлэх ухааны үүрэг роль их юм.

Манай Засгийн газарөнгөрсөн жил Говийн элсэн цөлд Засгийн газрын тусгай хуралдаан хийлээ.Цөл болон Цөлжилтийн Эсрэг Тэмцэх НҮБ-ын 10 жилийн ойн хүрээнд цөлжилттэй тууштай тэмцэх шийдвэр төгс байгаагаа манай Засгийн газар Говиос гаргасан илгээлтээрээ нийтэд илэрхийлсэн юм.

Манай оронд тулгараад байгаа байгалийн энэ гамшгийг сааруулах, түүнтэй тэмцэхэд та бүхний энэ хурлаас гарах шинжлэх ухаанч санал санаачлага бид бүхний ажилд маш их дэмжлэг болно гэдэгт би гүнээ итгэж байна.

Бид шинжлэх ухааныхаа үр өгөөжийг дээшлүүлэх, эрдэмтдийн санал, дүгнэлтийг төрийн бодлогод тусгахад онцлон анхаарч байна. Миний бие ШУА-ийн 2011 оны 1 сарын 27-нд болсон Их чуулган дээр энэ талаар үг хэлсэн. ШУА нь статусынхаа хуулийн дагуу УИХ-ын Нийгмийн бодлого, боловсрол, соёл, шинжлэх ухааны Байнгын хороонд ажлаа тайлагнаж, төр, засгийн бодлогын асуудлаар зөвлөмж гаргадаг байгууллага юм. Манай Байнгын хороо энэ онд гэхэд л ШУА-тай хамтарч байгалийн шинжлэх ухааны хөгжил болон нийгмийн бодлогын тулгамдсан асуудлаар хэлэлцүүлэг, хурал зохион байгуулаад байна.

Азийн шинжлэх ухааны зөвлөлийн ээлжит 11 дүгээр бага хурлын үйл ажиллагаанд амжилт хүсье.” гэлээ.

Д.Очирбат: Шинжлэх ухааны үр өгөөжийг дээшлүүлэх, эрдэмтдийн санал, дүгнэлтийг төрийн бодлогод тусгахад онцлон анхаарч байна