Ерөнхий сайдад "Танхимынхаа сайдуудад хариуцлага тооцооч " гэсэн утгатай мэдэгдлийг УИХ-ын дарга Д.Дэмбэрэл хүргүүлсэн. Мэдэгдлийн хариуг Ерөнхий сайд өгөөгүй байгаа. Өөрөөр хэлбэл, цаг барьдаггүй Сангийн сайд С.Баярцогт, УИХ-ын гишүүдэд шаардлагатай мэдээлэл өгдөггүй Эрдэс баялаг, эрчим хүчний сайд Д.Зоригт хоёрт ямар арга хэмжээ авахаа мэдэгдээгүй байна. Харин УИХ-ын Ёс зүйн дэд хорооны дарга Г.Баярсайханаас дээрх асуудалд хэрхэн хандаж байгааг нь тодрууллаа.

-УИХ-ын дарга хоёр сайдын талаар Ерөнхий сайдад "хов" хүргэлээ. Ёс зүйн дэд хороо энэ асуудлыг хэлэлцэх үү?

-Д.Зоригт сайдын ажлын чанар манай дэд хороонд хамаагүй. Сайдынхаа ажлын чанарт Засгийн газар анхаарна биз. Харин С.Баярцогт сайдын хувьд байр сууриа илэрхийлсэн.

-Ямар байр суурь вэ?

-УИХ-ын үйл ажиллагаанд цагтаа ирээгүй нь С.Баярцогтын хувийн зохион байгуулалттай холбоотой. Бид энэ тал дээр нь сануулга өгье гэсэн байр суурьтай байгаа.

-УИХ-ын дарга сайдуудыг ажлын хариуцлага алдсан гэж дүгнэж байгаа. Харин Ёс зүйн дэд хороо С.Баярцогт сайдад холбогдох асуудлыг хэлэлцэхгүй, сануулга өгөөд өнгөрөөхөөр шийдсэн юм уу?

-С.Баярцогт гишүүн гадаадын байгууллагын урилга, зардлаар гадаадад зорчсон талаарх гомдол Ёс зүйн хороонд ирсэн байгаа. Энэ асуудлыг нь Ц.Мөнх-Оргил гишүүн судалж байгаа. Тиймээс Д.Дэмбэрэл даргын гаргасан гомдлыг дээрх асуудалтай хамтатган хэлэлцэнэ.

-Ёс зүйн дэд хороо яг ямар хариуцлага тооцдог юм бэ. Цалингийнх нь тодорхой хувиар торгох уу. Эсвэл?

-Ямар хариуцлага тооцохыг Ёс зүйн дүрэмд тодорхой заасан байгаа. Ёс зүйн дэд хороо хуралдаж шийдвэрээ гаргасны дараа С.Баярцогт сайдад ямар хариуцлага тооцох нь тодорхой болно.