Тэд өсвөрийн эх орончид
Эх орныхоо төлөө сэтгэл, зүрхээрээ нэгдсэн хүүхдүүд бүлгэм байгуулжээ. Тодруулбал, “Өсвөрийн сэргийлэгчид”, “Өсвөрийн аврагчид”, “Өсвөрийн улаан загалмайч” зэрэг дугуйлангийн хүүхдүүд нэгдэж энэхүү бүлгэмийг байгуулсан байна.
Баянгол дүүргийн ИТХ, ЗДТГ, Гэмт хэргээс урьдчилан сэргийлэх ажлыг зохицуулах салбар зөвлөл хамтран 2013 онд “Сэргийлэгч” хөтөлбөрийг санаачлан хэрэгжүүлж эхэлсэн билээ. Энэ хүрээнд “Өсвөрийн сэргийлэгч” дэд хөтөлбөрийг батлан “Өсвөрийн эх орончдын бүлгэм”-ийг байгуулснаа өчигдөр албан ёсоор зарлалаа. Нээлт Баянгол дүүргийн 47 дугаар сургууль дээр болсон бөгөөд нээлтэд УИХ-ын гишүүн С.Одонтуяа, ИТХ-ын дарга Д.Дэлгэрбат, Цэргийн штабын дарга, хурандаа н.Ганбаатар нарын албаны хүмүүс оролцож, тэдэнд баяр хүргэсэн юм.
Сурагчдыг багаар ажиллах, хамтач үйл ажиллагаанд сургах, цэрэг, эх оронч хүмүүжлийг төлөвшүүлэх, чөлөөт цагийг зөв боловсон өнгөрүүлэх, сургуулийн дотоод дэг журмыг сахиулах зэрэг олон чадваруудыг эзэмшүүлэх зорилготой юм. “Өсвөрийн эх орончдын бүлэг” нь “Зориг нэг, зорилго нэг, зүтгэл нэг бид өсвөрийн эх орончид” гэсэн уриатай.
Тус бүлгэм нь нийслэлийн Баянгол дүүргийн 47, 13 дугаар сургуулийн нийт 100 хүүхдийн бүрэлдэхүүнтэй хүчирхэг “арми” аж. “Өсвөрийн сэргийлэгч”, “Өсвөрийн аврагч”, “Өсвөрийн зохицуулагч”, “Өсвөрийн энхийг сахиулагчид”, “Өсвөрийн Улаан загалмайч” гэсэн таван бүлгэмд 7-12 дугаар ангийн сурагчид сайн дурын үндсэн дээр хамрагдсан бөгөөд тэд хууль эрхзүйн мэдлэгтэй болоод зогсохгүй, шаардлагатай тохиолдолд анхны тусламж үзүүлэх мэдлэг, чадварт суралцах нь олзуурхууштай юм. Ийнхүү тэд ерөнхий боловсролын 13, 47 дугаар сургуулиуд дээр хуваарийн дагуу тусгай бэлтгэсэн танхимдаа хичээллэхэд бэлэн болжээ.
Баянгол дүүргийн 47, 13 дугаар сургуулийн нийт 100 хүүхдийн бүрэлдэхүүнтэй хүчирхэг “арми” аж.
Бүлэг тус бүр долоо хоногийн нэг өдөр “Өсвөрийн эх орончдын бүлгэм”-ийн дугуйлан, дадлага, сургалтад хамрагдах юм байна. Ингэхдээ тус дүүргийн цагдаагийн I, II хэлтэс сурагчдад гэмт хэргээс урьдчилан сэргийлэх, Замын цагдаагийн тасаг, замын хөдөлгөөний дүрэм, хуулийг сурталчлах, Онцгой байдлын хэлтэс гамшигаас хамгаалах болон аврах ажиллагааны анхан шатны мэдлэг олгох, Улаан загалмайн хороо болзошгүй ослын үед өөртөө болон бусдад эмнэлгийн тусламж үзүүлэх, Цэргийн штаб эх оронч үзэл хүмүүжлийг төлөвшүүлэх, дадлагыг олгохоор болсон байна.
Энэхүү бүлгэмийн үйл ажиллагааг Баянгол дүүргийн Онцгой байдлын хэлтэс, цагдаагийн I, II хэлтэс, цэргийн штаб, Улаан загалмайн хороо, Замын цагдаагийн тасаг хамтран багшлах боловсон хүчин, мэргэжлийн туслалцаа, зааварчилгаагаар хангах юм байна. Хэрэв үр дүн сайн байвал цаашид бусад сургуулиудад түгээн дэлгэрүүлэх юм. Дашрамд дурьдахад, өнгөрсөн онд энэхүү хөтөлбөрт 40 сая төгрөг төсөвлөсөн бол энэ онд 50-60 сая төгрөг болгон нэмэгдүүлжээ. Тиймээс ч сурагчдын хувцас хэрэглэл, гарын авлагатай болгоход энэ жил анхаарч ажиллах юм байна.
Энэ үеэр УИХ-ын гишүүн С.Одонтуяагийн сэтгэгдлийг сонслоо.
С.Одонтуяа: Үе тэнгийнхэндээ үлгэрлээрэй
/УИХ-ын гишүүн/
-Монгол Улсын хамгийн үнэт баялаг бол хүн. Тэгэхээр хүн рүүгээ, хүний хөгжил рүүгээ, хойч үе рүүгээ чиглэсэн төсөв хөрөнгө хэзээ ч үр ашиггүй байдаггүй. Иймд УИХ-ын гишүүн С.Эрдэнэ бид хоёр “Эх орон 36” хөтөлбөрийг санаачлан, хэрэгжүүлсэн. Энэ ажлыг цаашид зөвхөн нийслэлд биш, улс орон даяар хамарсан ажил болгохыг зорьсон юм. “Эх орон 36” хөтөлбөрт энэ онд нийслэлийн таван дүүргийн 5000 орчим хүүхэд хамрагдсан. Бид ирээдүй, хойч үедээ “за” гэж хэлвэл тэд ирээдүйд эх орныхоо төлөө “за” гэж хэлэх нь гарцаагүй. “Өсвөрийн эх оронч” бүлгэмийн хүүхдүүдэд баяр хүргэе. Та нар мундаг байна. Цаашид үе, тэнгийнхэндээ сайн, сайхан зүйлээр үлгэрлэж яваарай.
Б.Хулан: Би өсвөрийн сэргийлэгч
/47 дугаар сургуулийн 9б ангийн сурагч, “Өсвөрийн сэргийлэгч”/
-Миний хувьд өөрийн сонирхлоор “Өсвөрийн сэргийлэгч” болохоор шийдсэн юм. Сэргийлэгч болсноор үе, тэнгийнхнийгээ гэмт хэрэгт холбогдохоос сэргийлж чадна гэж бодсон. Ер нь сүүлийн жилүүдэд өсвөр үеийнхэн гэмт хэрэг, зөрчилд ихээр холбогдох болсон шүү дээ. Тэгэхээр хүүхдүүд бид хууль, эрхзүйн мэдлэгтэй болох нь маш чухал.
Би энэ бүлгэмд нэгдсэнээр эх орноо хайрлаж, хамгаалахад суралцахаас гадна олон талын мэдлэгтэй болно гэж бодож байгаа. Бас шаардлагатай тохиолдолд анхан шатны тусламж үзүүлэх чадвартай болно гэж манай бүлгэмийн сурагчид үзэж байгаа юм. Тиймээс энэ бол хүүхдүүд бидэнд маш үр, өгөөжтэй, олон талын ач холбогдолтой арга хэмжээ гэж бодож байна. Багш нартаа баярлалаа гэж хэлье.
