НИТХ-ын Тэргүүлэгчид “Нийслэлийн нутаг дэвсгэрт нийтийн эзэмшлийн гудамж, зам талбайд авто зогсоол төлөвлөх, байрьж байгуулах журам”-ыг баталлаа. Энэхүү журам

• Авто замын түгжрэлийг бууруулах,
• Авто зогсоолын хүрэлцээг нэмэгдүүлэх,
• Оршин суугчдын тав тухтай амьдрах орчинг бүрдүүлэх зорилготой.

Улаанбаатар хотын нутаг дэвсгэрт барилгажсан, шугам шүлжээ бүхий газарт нийт 10200 ширхэг авто гараж 55,26 га газрыг хамарч байна. Үүнээс зөвшөөрөлтэй – 1030, зөвшөөрөлгүй - 9170 байгаа юм.

Дээрх журмыг хэрэгжүүлэхдээ нийслэлийн Ерөнхий төлөвлөгөөний газар байршил тогтоох, төлөвлөх, хөрөнгө оруулалтын урьдчилсан тооцоог гаргах, иргэдэд танилцуулан санал авна. Үүний дараа нийслэлийн Засаг даргын захирамжаар батлагдсан ажлын хэсэг төсөл хэрэгжүүлэгчийг сонгон шалгаруулж, гэрээ байгуулах эрх олгосноор Улаанбаатар хотын Захирагчийн ажлын алба төсөл хэрэгжүүлэгчтэй хамтран ажиллах гэрээ байгуулна. Төсөлд тавигдах шаардлага нь

• Авто зогсоол төлөвлөж буй байршлын зурагтай байх,
• Төлөвлөж буй авто зогсоолын төсөл /төсөв, ажлын график төлөвлөгөө/ боловсруулсан байх,
• Орон сууцны хороолол дундах барилгажаагүй талбайд авто зогсоол барих бол энэ талаарх мэдээлэл бүхий самбарыг барилгажих талбайд 7-оос доошгүй хоног байршуулан оршин суугчдаас санал авсан байх,
• Төслийг хэрэгжүүлэхэд шаардагдах хөрөнгийн 60-аас доошгүй хувийн мөнгийг өөрийн дансанд байршуулсан байх зэрэг юм.