УИХ-ын гишүүн, Монгол-Солонгосын эдийн засгийн форумын ерөнхийлөгч Г.Батхүү, тус форумын Удирдах зөвлөлийн гишүүд болох УИХ-ын гишүүн Л.Болд, Су.Батболд, Н.Батцэрэг, Ж.Батсуурь, С.Одонтуяа, Н.Энхболд нар өнөөдөр /2015.08.11/ Солонгос-Монголын хамтарсан форумын ерөнхийлөгч Ү Юн Гын тэргүүтэй төлөөлөгчидтэй уулзлаа.

 Монгол-Солонгосын эдийн засгийн форумын ерөнхийлөгч Г.Батхүү, Монгол-Солонгосын эдийн засгийн форумын үйл ажиллагааг Солонгосын тал идэвхтэй дэмжиж ирсэнд талархаж буйгаа илэрхийлээд, хоёр орны ард түмний найрамдалт харилцаа, эдийн засгийн харилцааг идэвхжүүлэхээс гадна мал аж ахуй, газар тариалан, бусад салбарт шинэ технологи нэвтрүүлэхэд сүүлийн үед ихээхэн анхааран ажиллаж байгааг дурдлаа. Тэрбээр, эрүүл мэнд, боловсролын салбарын хамтын ажиллагаа идэвхжиж буйд сэтгэл хангалуун байгаагаа илэрхийлээд цаашдаа аялал жуулчлалыг хөгжүүлэхэд анхаарч ажиллана хэмээлээ.

Монгол-Солонгосын эдийн засгийн форумын Удирдах зөвлөлийн гишүүд уулзалтын үеэр, Солонгосын тал монгол оюутнуудыг суралцахад дэмжлэг үзүүлж буйд талархаж байгаагаа хэлж байлаа.

Солонгосын “Алтан гадас” сангаас монголын 20 оюутныг тус улсад тэтгэлэгтэйгээр суралцуулах болсон бөгөөд тус сангийн тэргүүн Чон Жан Сон өмнө нь Солонгос-Монголын хамтарсан форумын ерөнхийлөгчөөр ажиллаж байсан бөгөөд энэхүү уулзалтад оролцсон төлөөлөгчдийн бүрэлдэхүүнд мөн багтсан юм.

Солонгос-Монголын хамтарсан форумын дэмжлэгтэйгээр эрүүл мэндийн салбарын эмч мэргэжилтнүүдийг сургахаас гадна, зургаан аймгийн 40 гаруй суманд ногоочдод зориулсан сургалтыг солонгос мэргэжилтнүүд хариуцан явуулж, нийт 800 гаруй ногоочдыг хамруулсан талаар УИХ-ын гишүүн, Монгол-Солонгосын эдийн засгийн форумын ерөнхийлөгч Г.Батхүү хэлж байлаа.

Уулзалтад УИХ-ын Тамгын газрын Ерөнхий нарийн бичгийн дарга Б.Болдбаатар, Монгол-Солонгосын эдийн засгийн форумын гүйцэтгэх захирал Т.Буян-Ундрах болон албаны бусад хүмүүс байлцав. Солонгос-Монголын хамтарсан форумын төлөөлөгчид уулзалтын дараа УИХ-ын чуулганы танхим, Төрийн ордонтой танилцсан юм хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.