Нийслэл болон дүүргүүдийн ИТХ-ын 200 гаруй төлөөлөгч оролцсон "Төрийн бодлого-Нутгийн өөрөө удирдах ёс" семинар Төрийн ордонд боллоо. Түүгээр юуны тухай ярилцсан талаар УИХ-ын гишүүн, Монголын нутгийн удирдлагын холбооны тэргүүн Су.Батболдоос тодруулав.

-Орон нутгийн Парламентын төлөөлөгчдийг олноор оролцуулсан ийм семинар ойрд болоогүй шиг санаж байна. Юун тухай ярилцав?

- Орон нутгийн төсвийн эрх мэдлийг өргөтгөх асуудлаар УИХ, Засгийн газар ямар бодлого баримталж буй талаар орон нутгийн ИТХ-ын төлөөлөгчдөд тайлбарлаж, таниулахыг зорилоо. Нэг жил гаруйн өмнө батлагдсан Төрийн албаны тухай болон Орон нутгийн сонгуулийн тухай хуулиар ИТХ-ын бүтэц бүрэлдэхүүнд өөрчлөлт оруулж, төрийн албан хаагч ИТХ-д сонгогддог байсныг хориглосон.

Төсвийн байгууллагын удирдлага, санхүүжилтийн тухай хуульд УИХ өөрчлөлт оруулахаар болсон. Энэ талаар тэдний саналыг сонсох нь сургалт, семинарын үндсэн зорилго байв.

-Төрийн албан хаагчид ИТХ-д нэр дэвшихийг хориглосныг орон нутгийн удирдлагууд юу гэж үзэж байна вэ. Хуульд өөрчлөлт орсноор намаа сонгох, төрийн албанд ажиллахын алийг нь илүүд үзэж буй бол?

-Сонгогддог албан тушаалд нэр дэвших эсэх нь тухайн иргэний өөрийнх нь бие дааж шийдэх зүйл.
Бизнес эрхэлдэг болон төрийн албанд ажиллаж байгаа хүн өөрийн цаг завынхаа тодорхой хувийг орон нутгийнхаа хөгжилд зориулна гэж хүсвэл тэр нь хувь хүний сонголт байх юм. Үүнд ямар нэгэн албадлага, улс төрийн сонирхол байх ёсгүй. ИТХ-ыг иргэдийнх нь төлөөллөөр байгуулдаг байх
нь Төрийн албаны тухай хуулийн үндсэн зорилго. Өмнө нь ИТХ-ын төлөөлөгчийн олонх нь төрийн захиргааны албан хаагчдаас бүрддэг байсан бол одоо энэ байдал өөрчлөгдсөн. Төрийн албан хаагчид нь төрийнхөө ажлыг хийж, ИТХ-д иргэдийн төлөөлөл сонгогддог зарчим ингэж шийдэгдсэн. Одоо ухрах зам байхгүй.

-200 гаруй төлөөлөгчийн хэлж, санал болгож буй гол санал юу байв.

-Орон нутгийн бие даасан байдлыг бэхжүүлэх, санхүүгийн эрх мэдлийг нэмэгдүүлэх, ИТХ-ын төлөөлөгчийн цалин, хөлс, урамшууллын асуудлыг шийдвэрлэх, тойрогтоо ажиллах нөхцөл бололцоогоор хангах, орон нутгийн засаг, захиргааны байгууллага болон нутгийн өөрөө удирдах байгууллагын ажлын уялдаа холбооны талаар санал гаргаж, тодорхой асуудал тавьсан. Холбогдох байгууллагуудад тэдгээрийг уламжилна.

-ИТХ-ын төлөөлөгчдийн үгийг сонсож байх нь УИХ-д хэрэгтэй болов уу. Орон нутгийн улстөрчдийн санал, бодлыг төр, засгийн түвшинд хүргэдэг байх талаар Нутгийн удирдлагын холбоо юу хийх вэ?

-Нийслэл, дүүрэг, аймаг, сумын ИТХ-ын төлөөлөгчийн 60 гаруй хувь нь шинээр сонгогдсон. Тийм учраас ийм сургалт семинарыг төрийн байгууллага, Нутгийн удирдлагын холбоо хамтран уламжлал болгон зохион байгуулах саналыг дэмжсэн.

-Нутгийн удирдлагын холбоо хотуудын талаар ямар байр суурьтай байдаг юм бол. Өмнө нь байсан хотуудыг аймгийн статустай болгосон нь балаг тарьж байна л даа?

-Аймаг болгочихоод байгаа улсын хэмжээний том хот, орон нутгийн хотуудын асуудлыг эргэж харах зайлшгүй шаардлагатай. Судалж үзэхээс аргагүй асуудал.

Су.Батболд: Бие даасан байдлаа бэхжүүлэхийг орон нутгийн улстөрчид хүссэн