Монгол Улсын гамшгийн эрсдлийг бууруулахад оруулсан хувь нэмрийг нь үнэлж НҮБ-ын Ази-Номхон далайн бүс нутгийн газрын дарга Фенг Мин-ийг “Онцгой байдлын тэргүүний ажилтан” медалиар шагналаа. Шагналыг Монгол Улсын Шадар сайд У.Хүрэлсүх гардуулж баяр хүргэлээ.

Фенг Мин нь НҮБ-ын Ерөнхий нарийн бичгийн даргын тусгай төлөөлөгч, НҮБ-ын Гамшгийн эрсдэлийг бууруулах газрын дарга, хатагтай Маргарета Волстромыг Монгол Улсад айлчлуулахад ихээхэн хүчин зүтгэл гаргасан. Мөн ирэх 2018 онд Улаанбаатар хотноо болох Гамшгийн эрсдлийг бууруулах Азийн сайд нарын II Бага хурлыг зохион байгуулахад бүх талын дэмжлэг, туслалцаа үзүүлж байна. 

Нэр хүндтэй шагнал авсандаа Фенг Мин талархаж байгаагаа илэрхийлээд “БНЭУ-д болсон Азийн сайд нарын анхдугаар Бага хурлын нээлт болон, хаалтын үед Монгол Улсын Шадар сайд У.Хүрэлсүх таны хэлсэн үг олон улсын гамшгийн эрсдлийг бууруулах чиглэлээр хийж байгаа болон цаашид хийх ажилд хүчтэй нөлөөлсөн” гэлээ. Мөн өнгөрсөн мягмар гарагт болсон “Мэдлэгээ түгээцгээе: Газар хөдлөлтийн гамшгийн эрсдэлийг бууруулахад олон нийтийн оролцоо ба хариуцлага” сэдэвт үндэсний семинарыг амжилттай зохион байгуулсанд баяр хүргэлээ.