Д.Очирбат: Их, дээд сургуулийн тоо их байна

2011.05.05

Д.Очирбат: Их, дээд сургуулийн тоо их байна

УИХ-ын гишүүн, Нийгмийн бодлого,боловсрол, соёл, шинжлэх ухааны байнгын хорооны дарга Д.Очирбаттай УИХ-аар хэлэлцэж буй Дээд боловсролын санхүүжилт, суралцагчдын цалин, тэтгэлэг, тэтгэмж, нийгмийн баталгааны тухай хуулийн төслийн талаар болон дээд боловсролын шинэчлэлтийн асуудлаар тодруулга авлаа.

-Монгол Улсын Ерөнхийлөгчийн зүгээс санаачлан боловсруулсан хуулийн төслийг дэмжиж байгаа юу. Зарим иргэд энэ хуулийг сонгуулийн амлалтаа биелүүлсэн болж харагдах арга гэж харж байна. Харин та хэрхэн харж байна?

-Ерөнхийлөгчийн өргөн барьсан Дээд боловсролын санхүүжилт, суралцагчдын цалин, тэтгэлэг, тэтгэмж, нийгмийн баталгааны тухай хуулийн төслийг хэлэлцэхийг чуулганаар дэмжсэн. Улс орныхоо хөгжлийг бодож байвал сурч боловсрох оюутан залуусаа дэмжих хэрэгтэй. Төлбөрөө төлж чадахгүй байгаа оюутнуудаа дэмжих ёстой. УИХ-ын гишүүд бөөнөөр нь хавтгайруулан тэтгэхийг шүүмжилж байгаа. Ерөнхийлөгчийн өргөн барьсан төслөөр аливаа нэгэн ялгаварлалгүйгээр бүхэлд нь олгох тухай байна. Байнгын хороогоор хэлэлцэх үед төрийн дэмжлэгийг хэрэгцээтэй хэсэгт нь өгөх саналууд орж магадгүй.

-Их, дээд боловсролын салбарт ямар хууль эрх зүйн орчин дутагдалтай байгаа вэ. УИХ-д хэлэлцэгдэхээр орж ирсэн энэ хууль тэр орчинг бүрдүүлэхэд нийцэж байгаа юу?

-Одоогоор монголд 160 гаруй, үйл ажиллагаа тогтмол явуулж байгаа 110 гаруй их дээд сургууль байна. 2,7 хон сая хүнд энэ тоо арай л ихэдчихсэн. Энэ их дээд сургууль байх шаардлага байгаа эсэхэд эргэлзэж байна. Боловсрол соёл, Шинжлэх ухааны сайд нь саяхан хэлэхдээ “Энэ олон их дээд сургуулийг цөөлөх, стандартчилал тогтооох ёстой. Аттестатчилал хийж хоёр оронтой тоонд оруулна” гэж байсан. Гэхдээ энэ тоог 10, 20-д багтаасан ч болно. Ингэж байж л чанартай сургалт явагдана. Оюутны тоо багасна гэсэн үг биш сургуулийн тоо багасна гэсэн үг. Харин цөөн хэдэн сургуультай болчихвол тэднийг төрөөс маш сайн дэмждэг байх хэрэгтэй. Оюутнууд чанартай сургуульд суралцах ёстой болохоос биш подваль, айлын хажууд, түрээсийн байранд байдаг сургуульд суралцахаа болино. Сургалтын орчин байхгүй газар их дээд сургууль үйл ажиллагаа явуулж болохгүй биз дээ. Дээд боловсролын стандарт гэж байдаг бол түүндээ л хүрэх хэрэгтэй. Үүнд нь хүрч чадаагүй ар өврийн хаалгаар ороогүй бүх сургуулиудын хаалгыг нь барих ёстой. Оюутан залуус тэтгэлэг дэмжлэг олгож байгаа боловч энэ нь дахиад л нөгөө олон сургуулиудыг санхүүгээр нь дэмжиж буй хэлбэр л болж байна.