Ахмадын дэлхийн аварга шалгаруулах тэмцээн Унгарын Будапешт хотод өнөөдөр эхэллээ. Уг тэмцээнд оролцох манай улсын багийн бүрэлдэхүүнд 20 гаруй жүдоч оролцож байгаа. Эрэгтэй багийн бүрэлдэхүүнд МЖБХ-ны ерөнхийлөгч, самбо бөхийн дэлхийн аварга Х.Баттулга 90кг-д, жүдо бөхийн дэлхийн аваргын мөнгөн медальт О.Балжинням +100кг-д, дэлхийн аваргын хүрэл медальт Д.Баттулга 73кг-д, жүдо бөхийн холбооны шүүгч Ж.Энхболд, Л.Дөл хамгийн ахмад насны ангилалд Монгол Улсын харцага Ч.Өвгөнхүү зодоглохоор мэдүүлгээ явуулжээ. Харин МИАТ-тай холбоотой асуудал гарсан учраас ЗТБХБ-ын сайд Х.Баттулга Будапештийг зорих боломжгүй болсон байна.Эмэгтэй багийн бүрэлдэхүүнд Монгол Улсын гавьяат тамирчин Х.Эрдэнэт-Од, Д.Цэрэнханд нар багтсан байна. Хоёр жилийн өмнө зодог тайлж, шигшээ багийн дасгалжуулагчын албанд томилогдсон Х.Эрдэнэт-Од гавьяат дахин жүдогийн татамидаа гарах нь ээ.