Нийтийн тээврийн парк шинэчлэлийн хүрээнд БНСУ-аас 400 автобус авахаар болсон. Үүний эхний 20-ыг Цагаан сарын өмнө хүлээн авч, үйлчилгээнд гаргасан бол өнөөдөр хоёр дахь ээлжийн 40 автобус үйлчилгээнд гарлаа.  Хоёрдугаар ээлжийн автобусыг ЗТБХБ-ын сайд Х.Баттулга өчигдөр “Автобус 1” компанид хүлээлгэн өглөө. Уг арга хэмжээнд тэргүүн шадар сайд Н.Алтанхуяг оролцсон. Тэрээр “Хэдийгээр манай орон санхүү, эдийн засгийн хямралтай байгаа ч нээлтийн тээврийн салбартаа томоохон шинэчлэл хийх зорилт тавьсан. Энэ ажлыг маш шуурхай хийж байна. Засгийн газар ч хурдтай ажиллаж байгаа. Тэр дундаа дотроо ЗТБХБ-ын сайд Х.Баттулга илүү хурдтай ажиллаж, энэ автобусыг хурдан хугацаанд оруулж ирж, үйлчилгээнд гаргаж байна” хэмээгээд жолооч нарын алтан шар замыг өлзийтэй байг гэж ерөөсөн юм. Харин ЗТБХБ-ын сайд Х.Баттулга “Солонгосоос 400 автобус шинээр авч байгаа нь нийтийн тээврийн 30 орчим хувийг шинэчилж байгаа юм. Ямар ч гэсэн наадмын өмнө 400 автобус бүгдээрээ ирнэ” гэв.

Өнөөдрөөс үйлчилгээнд гарч байгаа 40 автобус “Үйлдвэр-Долоон буудал-Бэлх”, “МУБИС-Чингэлтэй-Зүрх уул” “МУБИС-Нисэх” Баянхошуу-Тэнгис кино театр” гэсэн чиглэлд үйлчилнэ. Уг автобус нь 20 хүний суудалтай 70 хүний багтаамжтай юм байна. Одоо “Автобус-1” компанийн 70 гаруй автобус үйлчилгээнд гарч байгаа. Эдгээр автобусуудынхаа шаардлага хангахгүйг нь ирэх тавдугаар сарын 1-нээс үйлчилгээнээс “халах” аж.
Энэ үеэр ЗТБХБ-ын сайд Х.Баттулга “Автобус-1” компанитай танилцсан. “Автобус-1” компани нь 120 автобусны граж, Спорт заал, бялдаржуулах танхим, ажилчдын чөлөөт цагаа өнгөрөөх орчныг бүрдүүлэхэд ихэд анхаарч байгаа талаараа танилцуулав.