УИХ-н чуулганы өнөөдрийн \2020.12.03\ нэгдсэн хуралдаанаар “Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах талаар чиглэл өгөх тухай” тогтоолын төслийг хэлэлцэж байна. 

Хуулийн хэлэлцүүлгийн үеэр УИХ-ын гишүүд асуулт асууж, санал хэллээ. 

УИХ-ын гишүүн Ц.Даваасүрэн асуулт асуулаа:

Манай бүх салбарт шинжлэх ухаанч хандлага байхгүй байна. Улс төрчид өөрсдийгөө бараг л шинжлэх ухааны салбараас том гээд бодчихоод байна. Өөрсдийн үгийг үнэн зөв гэж бодоод байна. Энэ цар тахлын үед нэг хүн, нэг ТББ бид нараар тоглож чадаж байна. Төр нь шинжлэх ухаанч дүгнэлт хийгээд амыг нь хааж чадахгүй байна. Дэлхийгээр нэг эрдэмтэдээ тараачихсан тэдэнтэй онлайнаар ярьдаг ард түмэн байж болохгүй. Найман сар, 800 гаруй хүн өвдлөө. Эндээс ямар хэмжээний гарз хохирол авчирах нь ойлгомжтой. Үүнтэйгээ уялдуулан тодорхой арга хэмжээ авмаар байна. Бизнесийг зогсоож болохгүй. Бизнесийн байгууллагуудын хаалгыг хаачихсан байхад ямар татвар төлөх вэ? Тийм учраас арга хэмжээ үр дүнтэй байхын тулд эрсдэлд өртөх хэсгийнхээ ариун цэвэр, эрүүл ахуйн арга хэмжээг авахуулаад бизнесийн орчныг хариуцаад явах хэрэгтэй.

Бид нар ярихаараа их том ярьж байна. Үүн дээр ямар хариуцлага ярьсан бэ?  Хэн ямар хариуцлага хүлээсэн бэ? Энэ үед үнэн нүүр царай харагдана. Бүх чиглэлээр бодлого, тогтоол гаргаж болно. Улс төрчид өөрсдийгөө хууль тогтоогч гээд өөр юм хийдэггүй гээд ойлгочихсон. Засгийн газар буруу юм хийвэл бид нар түүнийг засаж залруулж өөрчилөх хуультай. Одоо би зарчмын зөрүүтэй санал яаж гэрээсээ гаргах вэ?

Түүний асуултанд Төрийн байгуулалтын байнгын хорооны дарга Л.Энх-амгалан хариуллаа.

Энэ тогтоол ТББХ-оос гарч байгаа тогтоол биш юм. Шинжлэх ухаанчаар хандлах арга барил үнэхээр дутагдаж байна. Улс төрийн шийдлээр гарч байдаг учраас зарим шийдлүүд нь байгаа онохгүй буцдаг. Бусад улс орнууд эдийн засгаа сэргээх тал руу биднээс түрүүлж алхсан байна. Бид иргэдийнхээ амь насыг хамгаалах тал руу арга хэмжээ авч байсан бол одоо цаашдаа эдийн засгаа яаж сэргээх, ажлын байраа яаж авч үлдэх вэ гэсэн хамгийн том сорилт болоод байна.