УИХ-ын гишүүн, БШУ-ны сайд Л.Энх-Амгалан Ази, Номхон далайн бүсийн орнуудын боловсролын сайд нарын 2-дугаар хуралд орж байгаа билээ. Тэрээр Тайландын Хаант Улсын эрхэмсэг гүнж Маха Чакри Сириндорнд бараалхлаа.

Тайландын эрхэмсэг гүнж 2007 онд Монгол улсад айлчлахдаа сурагчдын хоолны чанар, шим тэжээл, эрүүл бүтээгдэхүүнээр хангах бичил тогтолцоог бүрдүүлэх төслийг Төв аймгийн Алтанбулаг, Баян, Бүрэн, Дундговь аймгийн Эрдэнэдалай, Сүхбаатар аймгийн Уулбаян сумын ерөнхий боловсролын сургуулиудад 2009-2016 оны хооронд хэрэгжүүлсэн.

Монгол Улсад өнөөдрийн байдлаар 358 мянган суралцагч “Үдийн хоол” хөтөлбөрт хамрагдаж байна. Цаашид гүнжийн санаачилсан “Туслах аж ахуйд суурилсан сургуулийн үдийн хоолыг хөгжүүлэх нь” төслийг өргөжүүлж, хэрэгжүүлэх саналыг уулзалтын үеэр хэллээ.

Мөн сургалтын хэрэглэгдэхүүн, анагаах ухааны чиглэлээр оюутан солилцох, түүхийн олдворын судалгааны чиглэлээр хамтран ажиллах талаар харилцан санал солилцов.