УИХ-ын чуулганы /2022.10.14/-ны өдрийн хуралдаанаар Монгол Улсын Их Хурлын гишүүн М.Оюунчимэгээс Монгол Улсын Ерөнхий сайдад хандаж “Эмийн үйлдвэрлэл, чанар, хяналт, хүртээмжийн зэрэг асуудал болон энэ талаарх цаашдын бодлого, зорилтын талаар”, Монгол Улсын Их Хурлын гишүүн Ц.Туваанаас Эрүүл мэндийн сайдад хандаж “Эм үйлдвэрлэл, эмийн үнийн талаар” тус тус тавьсан асуулгын хариуг сонслоо.

Гишүүд тус асуулгын талаар асуулт асууж байр, сууриа илэрхийллээ.

УИХ-ын гишүүн Н.Учрал:

УИХ дээр хүний эмийн чанарын хяналт шалгалтын түр хороог байгуулан ажиллаж байгаа. Түр хороон дээр холбогдох мэдээллүүдийг сонссон. Мөн өнгөрсөн чуулганаар Нийгмийн бодлогын байнгын хороонд эмийн чанарын асуудлаар хэд хэдэн мэдээлэл сонссон. Аудитын байгууллага ч тодорхой дүгнэлтийг хийсэн байгаа. Бид тодорхой зорилтуудыг дэвшүүлж байгаа юм. Хүний эмийн чанарын хяналтын түр хороо нь нөхцөл байдлыг бодитой дүгнэхийн төлөө л ажиллана. Нөхцөл байдлыг бодитой дүгнэхгүйгээр чанаргүй эм хэрэглэж байна, эрүүл мэндийн салбарт эмийн асуудал өндөр түвшинд тавигдсан гэдэг ерөнхий байдлаар дүгнэж, эм ханган нийлүүлэх байгууллага, зохистой үйлдвэрлэл явуулж буй байгууллагуудын нэр хүндэд халдаж болохгүй.  Тиймээс асуудалд бодитойгоор  хандах ёстой.

Үндэсний аудитын байгууллагаас GMP-ийн шаардлага буюу үйлдвэрлэлийн стандартын шаардлага хангаагүй эм үйлдвэрлэж байна гэсэн дүгнэлт гаргасан. Тусгай зөвшөөрөлтэй нийт 38 эмийн үйлдвэр байгаагаас 7 үйлдвэр  дотоодых, нэг нь Европын GMP-ийн шаардлага хангасан үйл ажиллагаа явагдаж байгаа. Энэ асуудал юунаас болж гарч байна гэдэг дүгнэлт гаргахын тулд шинжилгээний лабораторид энэ эмнүүдийг шалгуулъя гэхээр хуучин мэргэжлийн хяналт дээр байгуулагдсан шинжилгээний лабораторийн хүчин чадал, тоног төхөөрөмж нь өөрөө орчин үеийн чанарын шаардлага, стандартыг хангахгүй байгаа юм. Тэгэхээр дараа долоо хоногт уг лабораторийн үйл ажиллагаатай танилцаж, дүгнэлт гаргая гэж зорьж байна.

Хоёрдугаарт олон улсын хэд хэдэн байгууллагууд руу хамгийн өргөн хэрэглэж байгаа эмнүүдээс сонгож аваад лабораторид шинжлүүлнэ. Үүний дүгнэлтийг гаргаад үнэхээр концентраци нь муу, үйлдвэрлэлийн шаардлага хангаагүй эм үйлдвэрлэж байгаа эсвэл ханган нийлүлж буй компаниуд байвал шаардлагатай арга хэмжээг авна. Цаашдаа эмийн жагсаалтаа шинэчлэх, эмийн бүртгэлийг цахимаар орчин үеийн технологид суурилж хийх зэрэг хэд хэдэн зорилт дэвшүүлж байгаа. Эмийн чанарын хянан шалгах түр хороотой ямар арга хэмжээ авбал зохистой байгаа вэ?

Түүний асуултад Эрүүл мэндийн сайд С.Энхболд хариуллаа.