"Ажилсаг Монгол-Хөгжлийн үндэс" сэдвийн хүрээнд Герман улсад мэргэжил, боловсрол эзэмшсэн үе үеийн 1,000 төлөөлөгч 2017 оны гуравдугаар сарын 17-ны өдөр Төрийн ордны Их танхимд чуулах гэж байгаа юм.

Энэ талаар УИХ-ын гишүүн, Эдийн засгийн байнгын хорооны дарга Д.Тэрбишдагва болон чуулга уулзалтыг зохион байгуулах ажлын хэсгийнхэн өнөөдөр мэдээлэл хийлээ.

УИХ-ын гишүүн, Эдийн засгийн байнгын хорооны дарга Д.Тэрбишдагва "ХБНГУ-д сургууль төгссөн 35,000 хүн байдаг. Үүнтэй холбоотой бид 1,000 Германд сургууль төгсөгчдийн чуулга уулзалтыг зохион байгуулах гэж байгаа юм.

Энэ арга хэмжээнд мөн өдрүүдэд ХБНГУ-ын Засгийн газрын хэмжээний айлчлалын хүрээнд хүрэлцэн ирэх Германы эдийн засаг, хамтын ажиллагаа, хөгжлийн яамны парламентын төрийн нарийн бичгийн дарга Ханс-Иоахим Фухтел тэргүүтэй, Засгийн газар, муж улсын захирагч, хувийн хэвшлийн төлөөлөгчдийн бүрэлдэхүүн оролцож байгаа нь онцлог. Германы төлөөлөгчдийг оролцож байх 2 цагийн хугацаанд бид бүх илтгэл, асуулт, хариултаа Герман хэл дээр явуулна" гэлээ.

Энэхүү чуулга уулзалт нь Герман-Монголын эдийн засгийн хамтын ажиллагаа эхлүүлсний 25 жилийн ойд зориулсан хүндэтгэлийн арга хэмжээ болж байгаагаараа мөн онцлогтой юм байна.