Хүнсний хангамжийн тогтвортой, тэнцвэртэй байдлыг хангах, хүнсний сүлжээнд бүтээгдэхүүний аюулгүй байдлыг хангахад хэрэглэгчийн мэдлэг боловсролыг дээшлүүлэх, зөв зохистой хооллох дадлыг төлөвшүүлэх нь чухал ач холбогдолтой байна.
Өнгөрсөн баасан гарагт /2020.01.10/ тус хөдөлгөөний хэлэлцүүлэг болж ХХААХҮ-ийн сайд Ч.Улаан, Дэд сайд Ж.Сауле, ЭМ-ийн сайд Д.Сарангэрэл тэргүүтэй цэцэрлэг болон дунд сургаалын удирдлага багш, эцэг эх, мэргэжлийн тогооч нарын төлөөлөл оролцлоо.
“Эрүүл хүнс – Эрүүл Монгол хүн” үндэсний хөтөлбөр – Хэрэглэгчийн боловсрол”, “Өглөөний цай эрүүл мэндэд нөлөөлөх нь”, “Хүн амын хүнсний хэрэглээнд шим тэжээлийн боловсролыг дээшлүүлэхийн ач холбогдол”, “Гэр бүлийн хүнсний хэрэглээний сонголтыг ээжүүд гүйцэтгэдэг” сэдэвт илтгэл тавьсан юм
Хэлэлцүүлгийн төгсгөлд ХХААХҮ-ийн Дэд сайд Ж.Сауле нэгдсэн дүгнэлт, уриалгыг сонордуулсан юм.
“ЭЭЖИЙН СОНГОЛТ – ЭРҮҮЛ ХҮНС” БОЛОН “ӨГЛӨӨНИЙ ЦАЙ” ХӨДӨЛГӨӨНИЙ ХҮРЭЭНД ЗОХИОН БАЙГУУЛСАН ХЭЛЭЛЦҮҮЛГЭЭС ГАРСАН УРИАЛГА
Нэг. Монгол Улсын ээжүүд, эмэгтэйчүүдэд:
1. “Ээжийн сонголт – Эрүүл хүнс” болон “Өглөөний цай” хөдөлгөөнд манлайлж, идэвх санаачилгатай оролцох.
2. Үндэсний үйлдвэрийн чанартай хүнсний бүтээгдэхүүнийг түлхүү худалдан авах, зөв зохистой хадгалах, боловсруулах, хэрэглэх хандлагыг өсвөр залуу үед төлөвшүүлэх.
3. Хүнсний хэрэглээ, шим тэжээлийн талаарх мэдлэг боловсролд суралцах, өрх гэр бүлээ эрүүл, чанартай хүнсний хэрэглээнд сургах.
Хоёр. Дотоодын хүнсний боловсруулах үйлдвэр, худалдаа, хоол үйлдвэрлэл, үйлчилгээний салбарын аж ахуйн нэгжүүдэд:
1. Хүн амын хэрэгцээнд чанартай хоол хүнс үйлдвэрлэж нийлүүлэх.
2. Хүнсний бүтээгдэхүүний нэр төрлийг нэмэгдүүлэх, сав баглаа боодлыг сайжруулж, өрсөлдөх чадварыг дээшлүүлэх.
3. Хэрэглэгчийн боловсролыг дээшлүүлэх чиглэлд сургалт, сурталчилгаа, олон нийтийн нөлөөллийн ажлыг зохион байгуулах.
4. Өглөөний цай хөдөлгөөнд хамрагдаж, өглөөний цайны үйлчилгээг нэвтрүүлэх, үйлчилгээний соёл, дэвшилтэт хандлагыг төлөвшүүлэх.
Гурав. Хэвлэл, мэдээллийн байгууллагуудад:
1. Нийгмийн хариуцлагын хүрээнд “Ээжийн сонголт – Эрүүл хүнс” болон “Өглөөний цай” хөдөлгөөнийг дэмжин тогтмол сурталчлах.
2. Эдгээр хөдөлгөөний талаар сошиал орчинд давлагаа өрнүүлэх.
Дөрөв. Эрдэм шинжилгээ, судалгааны байгууллагуудад:
1. Монгол хүнд тохиромжтой, өрхийн орлогын төвшинд нийцсэн өглөөний цайны хувилбарт цэсүүдийг хамтран боловсруулах.
2. Хүнсний судалгаа хөгжилд боловсруулах үйлдвэрүүд, хоол үйлдвэрлэл, үйлчилгээний газруудтай хамтран ажиллах.
Хүнс, хөдөө аж ахуй, хөнгөн үйлдвэрийн яам, “Монголын эмэгтэйчүүдийн хөгжлийн манлайлал” НҮТББ хамтран энэхүү арга хэмжээг зохион байгуулж байна.