Ойг угтан зохион байгуулж буй арга хэмжээний талаар өнөөдөр /05.24/ төрийн ордонд ХНХЯ, Олон улсын Хөдөлмөрийн байгууллагын Хятад, Монгол улсыг хариуцсан товчооны захирал Клэйр Куртье Мюлдер болон МҮЭХ, МАОЭНХ-ны удирдлагууд мэдээлэл хийв.

Тус байгууллага хөдөлмөрийн хэм хэмжээ тогтоодог, НҮБ-ын цор ганц гурван талт байгууллага юм. Одоогоор 187 гишүүн оронтой, дэлхий нийтэд 45 товчоо, бүс нутгийн 5 товчоотой үйл ажиллагаа явуулж байгаа аж. Монгол Улс ОУХБ-т 1968 оны энэ өдөр элсэн орсон бөгөөд 8 суурь конвенци, бусад 20 конвенцийг соёрхон баталсан гэдгийг хатагтай Клэйр Куртье-Мюлдер дурьдлаа.

Тэрбээр, “Өнгөрсөн хугацаанд манай байгууллага Монгол Улсын Засгийн газартай хүүхдийн хөдөлмөр эрхлэлтийг бууруулах, нийгмийн халамжийн хүртээмжийг сайжруулах чиглэлд хамтран ажиллаж ирсэн. Цаашдаа НҮБ-ын Тогтвортой хөгжлийн 17 зорилтыг хэрэгжүүлэх чиглэлд Монгол Улстай хамтран ажиллах болно” гэлээ.