Гадаад харилцааны сайд Б.Батцэцэг Японы Улаан загалмай нийгэмлэгийн Ерөнхийлөгч А.Сэикэ-тэй уулзаж, тус нийгэмлэгийн Мэдээллийн төвтэй танилцав.

Сайд Б.Батцэцэг Японы Улаан загалмай нийгэмлэг нь уур амьсгалын өөрчлөлт, гамшгийн менежмент, эрүүл мэнд, нийгмийн асуудлыг шийдвэрлэх зэрэг өргөн хүрээний салбарт дэмжлэг үзүүлж, ойр нягт хамтран ажиллаж ирсэнийг талархан тэмдэглэв.

Тэрбээр Монгол Улс цөлжилттэй тэмцэх, уур амьсгалын өөрчлөлтөд дасан зохицох, нөлөөллийг нь бууруулах, болзошгүй томоохон хэмжээний байгалийн гамшгаас урьдчилан сэргийлэх, сөрөн тэсвэрлэх чадавхийг сайжруулахад онцгойлон анхаарч буйг тэмдэглэж, нэн ялангуяа хүүхэд залуучуудад гамшгаас урьдчилан сэргийлэх, бэлэн байдлаа хангах дадал чадвар эзэмшүүлэх, гамшгаас хамгаалах боловсрол олгоход туршлага хуваалцаж хамтран ажиллахын төлөө буйг илэрхийлэв.

Японы Улаан загалмай нийгэмлэгийн Ерөнхийлөгч А.Сэикэ Монгол Улсын Засгийн газар, Монголын Улаан загалмай нийгэмлэгийн зүгээс Япон Улсын Ишикава мужийн Ното бүс нутагт болсон хүчтэй газар хөдлөлтийн гамшгийн дараах сэргээн босголтод зориулж, сэтгэл шингэсэн тусламж үзүүлсэнд чин сэтгэлийн талархал илэрхийлэв.

Талууд гамшгийн эрсдэлийг бууруулах, хариу арга хэмжээ авах, бэлэн байдлыг хангахад чиглэсэн сургалт хэрэгжүүлэх зэргээр үргэлжлүүлэн нягт хамтран ажиллах талаар ярилцав.

Гадаад харилцааны сайд Б.Батцэцэгт хүмүүнлэгийн үйлсэд оруулсан хувь нэмрийг нь үнэлэн Японы Улаан Загалмай нийгэмлэгийн хүндэт одон олгов.