Улсын Их Хурлын гишүүн, Ёс зүй, дэгийн байнгын хорооны дарга Б.Баярбаатар Европын аюулгүй байдал, хамтын ажиллагааны байгууллага (ЕАБХАБ)-ын Ардчилсан институц, хүний эрхийн алба (АИХЭА)-ны Ардчилсан засаглал ба жендэрийн хэлтсийн дарга Юлия Нетесова тэргүүтэй төлөөлөгчидтэй өнөөдөр /2025.06.18/ уулзлаа.

Байнгын хорооны дарга Б.Баярбаатар уулзалтын эхэнд УИХ-д суудалтай таван намын хүрээнд парламентын болон улс төрийн намын шударга байдал сэдвээр зохион байгуулсан хоёр өдрийн хэлэлцүүлэгт оролцож, туршлагаа хуваалцсанд талархаж буйгаа илэрхийллээ. 2025 он улс төрийн намуудын хувьд онцгойлон үүрэг хүлээсэн жил гэдгийг тодотгоод, шинэчлэн баталсан Улс төрийн намын тухай хуульд заасны дагуу улс төрийн намууд их хурлаа хуралдуулж, хуульд нийцүүлэн дүрмээ шинэчлэх ёстойг тэмдэглэсэн юм. Энэхүү хуульд заасны дагуу анх удаа улс төрийн намуудын үйл ажиллагаанд төрөөс дэмжлэг үзүүлэлт зохицуулалт хэрэгжинэ хэмээгээд, энэ нь намуудын төлөвшилд ихээхэн хувь нэмэр оруулна гэдэгт итгэлтэй байгаагаа илэрхийлэв.

Тэрбээр 2023 онд Улс төрийн намын тухай хуулийг шинэчлэн баталсан түүхийг танилцуулж, УИХ-ын гишүүдтэй хамтран Улс төрийн намын санхүүжилтийн тухай хуулийн төслийг боловсруулахаар ажиллаж байгаа талаар мэдээлэл өгсөн. Мэдээж хуулийн төслийг амжилттай боловсруулан батлуулахад судалгаанаас гадна ЕАБХАБ-ын Ардчилсан институц, хүний эрхийн албаны мэргэжилтнүүдийн зөвөлгөө чухал үүрэгтэй гэдгийг онцолсон.

ЕАБХАБ-ын Ардчилсан институц, хүний эрхийн албаны Ардчилсан засаглал ба жендэрийн хэлтсийн дарга Юлия Нетесова, Хоёр өдрийн турш парламентын болон улс төрийн намын шударга байдлын талаар хэлэлцсэн арга хэмжээг амжилттай зохион байгуулсан Ёс зүй, дэгийн байнгын хороо, Парламентын судалгаа, хөгжлийн хүрээлэнгийн удирдлагад талархал илэрхийлээд, хэлэлцүүлэг улс төр, захиргаа, судалгаа, зохион байгуулалтын хувьд өндөр түвшинд болж өнгөрснийг онцолсон юм.

Хатагтай Юлия Нетесова, ардчиллын түүхэн амжилт, алдааг судлах маш том орон зай байгааг дурдаад, зорилго, төлөвлөгөө, амлалт гээд бүх зүйл нь тодорхой парламенттай хамтран ажиллахад таатай байгаагаа илэрхийлэв.Хоёр өдрийн хэлэлцүүлгийн арга хэмжээ эрч хүчтэй, санаачилгатай байсан хэмээгээд, хэлэлцүүлэгт оролцогчид тодорой дүрэм журамд өөрчлөлт оруулах нь зүйтэй гэсэн байр суурьтай байсныг тодотгосон.

Уулзалтын үеэр судалгаа хийх, туршлага солилцох, улс төрийн намыг зөв төлөвшүүлэх, авлига, ашиг сонирхлыг бууруулах, нээлттэй байдал, ил тод байдлыг нэмэгдүүлэх чиглэлээр хамтран ажиллах талаар санал солилцлоо. Уулзалтад УИХ-ын гишүүн Д.Энхтуяа, Парламентын судалгаа, хөгжлийн хүрээлэнгийн захирал Д.Бумдарь нар оролцов

Байнгын хорооны дарга Б.Баярбаатар ЕАБХАБ-ын Ардчилсан институц, хүний эрхийн албаны төлөөлөгчидтэй уулзав