Цөмийн эрчим хүчний гол түүхий эд болох ураны нөөцийн 90 гаруй хувь нь дэлхийн 13 улсад бий, түүний нэг нь манай улс бөгөөд өнөөдрийн байдлаар ураны 13 ордод 192 мянган тонн нөөц тогтоогдсон. Дэлхий нийт эрчим хүчний нүүрсний хэрэглээнээс татгалзаж, дараагийн эрчим хүчний эх үүсвэр болох ураны асуудалд анхаарал хандуулаад эхэлсэн.

Манай улсын хувьд цахилгаан станц дээр ашиглагдаж буй цөмийн түлшний анхдагч түүхий эд болох ураны шар нунтгийг олборлохоор зорьж буй. Дэлхийд эрэлт нь өсөж, эрчим хүчний эх үүсвэр болдог ураны үнэ тогтвортой байж, өсөх нь тодорхой харагдаж байгаа. Магадгүй цөмийн эрчим хүчийг орлох өөр бүтээгдэхүүн гарч ирэхэд, уран үнэгүйдэх боломжтой. Иймд тухайн уул уурхайн бүтээгдэхүүнийг эдийн засгийн хувьд ашигтай байхад нь ашиглах нь зөв байх.

Гэтэл иргэдийн дунд урантай холбоотой буруу, ташаа мэдээлэл их байдаг. Саяхан МҮОН-ийн телевизээр Урантай холбоотой нээлттэй хэлэлцүүлэг өрнөхөд, учир мэдэх хүмүүс хүртэл “уран хортой, хоргүй” гэх мэтээр мэтгэлцлээ.

Энэхүү мэтгэлцээнд оролцсон УИХ-ын гишүүн Б.Уянга

“Хэрвээ эрдэмтдэдээ итгэхгүй байгаа бол хими, физикийн багш нараасаа асуу, тодруул. Үүнээс цаашлаад, судлах хэрэгтэй. Ураны асуудал яригдахаар эх орондоо хайртай хэсэг бүлэг хүмүүс, эх орондоо хайргүй бас нэг хэсэг хүмүүс байгаа мэт талцаж, хуваагддаг. Газарзүй, геоэкологийн хүрээлэн, Хими,химийн технологийн хүрээлэн,Монгол Улсын шинжлэх ухааны академи маш олон судалгаа хийчхээд, өөрсдөө, ярих хэрэгтэй.  ШУТИС Уул уурхайн мэргэжилтэн бэлддэг. Энэ Багш нар маань үүнийг сайн яриад өгөөч ээ”.

Гэж хүслээ. Хүн мэдэхгүй зүйлээсээ их айдаг, хэрвээ мэдээд ирвэл тэр нь айдас биш мэдлэг, туршлага болон үлддэг гэдэг дээ. Иймд манай эрдэмтэн, судлаач нар ураны талаар ярьж, хэлж, тайлбарлаж хүн ардынхаа мэдлэгт хувь нэмэр оруулж ажиллахыг цаг үе шаардаад л байна даа.

Сэтгүүлч

Сэтгүүлч Ц.Соёлмаа soyolmaa@vip76.mn