Кувейтийн сангийн буцалтгүй тусламжаар барих парламентын шинэ ордны газрын асуудал шийдэгджээ. Гэхдээ Төрийн ордны баруун, зүүн талд, эсвэл Их тэнгэрийн ам, Яармагт барина гэж байсан шинэ ордон цэцэрлэгт хүрээлэнгийн оронд сүндэрлэх нь. Тодруулбал, хотын төвд ганц гэж хэлж болохоор Төрийн ордны хойд талын цэцэрлэгт хүрээлэнг буулгахаар эрх баригчид төлөвлөжээ.

Засгийн газрын хуралдаанаас барилгын ажлын гүйцэтгэгчийг сонгон шалгаруулах шийдвэр ч гарчхаад байгаа юм.Үүнийг ИЗН эсэргүүцэж "Төрийн ордны хойд талд буй цэцэрлэгт хүрээлэнгийн газар дээр парламентын ордон барихаар эрх баригчид шийдвэрлэснийг буруушааж байна. Хотын хүн амын төвлөрөл өсч, агаарын бохирдол гамшгийн хэмжээнд хүрсэн энэ үед цэцэрлэгт хүрээлэнг устгах нь харалган бөгөөд цөөн албан тушаалтны эрх ямбын төлөө олон нийтийн эрх ашгаас урвасан үйлдэл болох юм. Дээрхийн адил ногоон байгууламжийг дахин байгуулахын тулд наад зах нь 50-70 жил хэрэгтэй гэдэг нь ойлгомжтой. Иймд ИЗН цэцэрлэгт хүрээлэнг өөрийн хамгаалалтад авч, олон түмний эрх ашигт үл нийцэх шийдвэрээсээ нэн даруй татгалзахыг эрх баригчдаас шаардаж байна" хэмээн мэдэгдэл гаргаад байна. УИХ-ын 23 гишүүн цэцэрлэгт хүрээлэнг буулгаж, парламентын шинэ ордон барихыг эсэргүүцэж буйгаа Төрийн байгуулалтын байнгын хороонд албан ёсоор илэрхийлжээ. Тэдний нэг УИХ-ын гишүүн Г.БАЯРСАЙХАНТАЙ уулзлаа.

-Төрийн ордны хойд талын цэцэрлэгт хүрээлэнг буулгаж шинэ ордон барихыг эсэргүүцэж 23 гишүүн гарын үсэг зуржээ. Энэ талаар тодруулахгүй юү?

-Энэ цэцэрлэгт хүрээлэн 60 жилийн настай. Тухайн үеийн шилдэг сэхээтнүүд цэцэрлэгт хүрээлэнг бий болгосон. Одоо бид мод тарихыг хичээж байгаа ч харамсалтай нь ургахгүй байгаа шүү дээ. Тэгэхээр Төрийн ордны хойд талынх шиг цэцэрлэгт хүрээлэн бий болгоход хүндрэлтэй. Заавал үүнийг сүйтгэх шаардлага байхгүй. Нөгөөтэйгүүр, өнөөдөр бидэнд хэрэгтэй зүйл ордон уу, төрөх эмнэлэг үү гэдгийг бодолцох ёстой. Мэдээж Төрийн ордон ажиллаж байгаа хүмүүсийн ажил-лах нөхцөлийг сайжруулах нь зөв. Гэхдээ ордноос илүү төрөх эмнэлэг шаардлагатай байна шүү дээ. Заавал барих ёстой гэвэл ордны баруун, зүүн, эсвэл өөр хаана ч барьж болно. Тиймээс цэцэрлэгт хүрээлэнг нураахын эсрэг УИХ-ын эко сэтгэлгээтэй гишүүд гарын үсэг зураад байна.

-Кувейтийн сангаас заавал ордон барь гэсэн юм биш үү?

-Учир байдлаа яриад эрүүл мэндийн салбарт хөрөнгө оруулалтыг шилжүүлж болно. Яахав, ордон барилаа гэж бодоход сонгосон газар нь буруу хувилбар байна. Бид алтан зоос булаад ч мод ургуулж чадахгүй байна. Энэ цэцэрлэгт хүрээлэнд 60 гаруй нэр төрлийн ургамал, бутлаг сөөг ургадаг юм шүү дээ.

-Зарим хүн цэцэрлэгт хүрээлэнг нураахгүйгээр дээр нь ордон барина гээд байгаа. Тийм боломж байдаг юм уу?

-Гэрэлгүй амьдрал яаж байх вэ. Тэр тусмаа ургамал нар руу тэмүүлдэг. Миний санаанд багтахгүй л байна.

-Гишүүд ордны өрөөгөө тухгүй байна гээд шинэ ордон яаралтай барихыг шаардсан юм биш үү?

-Би өрөөндөө сэтгэл хангалуун л байдаг. Болоод л байна. Тэр аугаа АНУ-д ч гэсэн Ерөнхийлөгч нь жижигхэн байшинд л байдаг шүү дээ. Бид эсгий гэртэйгээ дэлхийн талыг удирдаж байсан түүхтэй улс. Өөрөөр хэлбэл, гол нь төрийн аппаратыг цомхон, чадварлаг болгох хэрэгтэй. Төрийн аппарат данхайчихсан, албан тушаалын давхардал байгаа нь нууц биш шүү дээ. Асуудлыг шийдэх арга нь тэр юм.