НҮБ-ын Ерөнхий Ассамблей 1994 оноос эхлэн жил бүрийн 6-р сарын 17-ны өдрийг ‘’Ган, цөлжилтийн эсрэг дэлхийн өдөр’’ болгож, энэ жил “Газар нутгаа сэргээж, боломжуудыг нээцгээе“ уриан доор тэмдэглэж байна.

Монгол Улсын газарзүйн онцлог байдал, экологийн эмзэг тогтолцоо, уламжлалт газар ашиглалтын хэв маяг нь цөлжилт, газрын доройтолд ихээхэн өртөмтгий нөхцөл байдал үүсгэдэг.

Уур амьсгалын өөрчлөлт, бэлчээрийн даац хэтрэлт, газар ашиглалтад гарч буй өөрчлөлт, хүн амын шилжилт суурьшил зэрэг хүчин зүйлсийн улмаас манай улсын нийт газар нутгийн 77 орчим хувь нь цөлжилт, газрын доройтолд өртсөн гэж судлаачид үзэж байна.

Байгалийн үндэс суурь болох газрыг нөхөн сэргээх нь орон нутагт ажлын байр бий болгох, хүнс, усны аюулгүй байдлыг нэмэгдүүлэх, уур амьсгалын өөрчлөлтийг сааруулах, эдийн засгийн өсөлтийн боломжийг бий болгоход тусалдаг.

Ган цөлжилт, доройтсон газрыг нөхөн сэргээхийн төлөө хамтдаа тэмцэе.