2010.02.12

Б.Бат-Эрдэнэ: Ц.Мянганбаяр Хангайн нурууг сүйтгэж, Орхоныг бохирдууллаа

УИХ-ын Хууль зүйн байнгын хороо намрын чуулганаар хийсэн ажлаа тайлагнан хэвлэлийн бага хурал хийлээ. Намрын чуулганы хугацаанд тус байнгын хороо 13 хууль, тогтоол хэлэлцүүлэн баталсан байна. Хуульзүйн  байнгын хорооны дарга Б.Бат-Эрдэнэ, УИХ-ын гишүүн З.Энхболд, Д.Тэрбишдагва нар сэтгүүлчдэд мэдээлэл хийж тэдний сонирхсон асуултад хариулсан юм.

-Харилцаа холбооны тухай хуулийн төслийг хаалттай хэлэлцсэн. Хаврын чуулганд оруулж батлах болов уу?


Хууль зүйн байнгын хорооны дарга Б.Бат-Эрдэнэ:
-"Харилцаа холбооны тухай хуулийн төсөл"-ийг хэлэлцэх үед улс төрийн намын бүлгүүд хэд хэдэн удаа хаалттай хуралдсан. Хамтарсан ажлын хэсэг гарч Харилцаа холбооны тухай хуульд тагнуулынхан чагнах эрхтэй байх саналыг оруулж ирсэн. МАХН-ын бүлгийн хуралдааны үеэр зарим гишүүн зөвхөн тагнуулын байгууллагад биш цагдаагийнханд чагнах эрх олгох хэрэгтэй гэсэн санал гаргаж завсарлага авч байсан. Түүнээс биш хил хүчний өөр байгууллагынхныг заавал оруулах шаардлага байхгүй гэж үзсэн. Эрүүгийн нөхцөл байдал амаргүй хэрэг илрүүлэх гэдэг үүднээс цагдаагийнханд чагнах эрх өгөх санал гарсан.

-Долдугаар сарын 1-ний үед хууль хяналтынхан хэрхэн уялдаа холбоотой ажилласан талаар танилцсан ажлын хэсгийн дүгнэлт хэзээ гарах бол?

УИХ-ын гишүүн Д.Тэрбишдавга:
- Долдугаар сарын 1-ний үйл явдалтай холбоотойгоор байгуулагдсан ажлын хэсгийнхэн нэлээд ачаалалтай ажилласан. Уулзах ёстой хүмүүстэйгээ уулзаж яриа, тайлбарыг нь сонсч, материалуудтай уншиж танилцаж дууссан. Ажлын хэсгийн гишүүд санал бичээд ажлын хэсгийн ахлагчид өгөх учиртай. Ажлын хэсгийнхэн нийлж хуралдаж хэлэлцээд дүгнэлт гаргана. Амаргүй ажил. Тухайн үеийн үндэсний аюулгүй байдлын зөвлөлийн гурван гишүүн гурвуулаа алга. Ийм үед дүгнэлт гарч таарах нь. Болсон үйл явдлын талаар хоёр жилийн дараа дүгнэлт гаргах хялбар биш. Хамгийн гол нь цаашид ийм үйл явдал давтан гаргахгүйн төлөө ажиллах ёстой. Хууль хяналтын байгууллагуудын уялдаа холбоотой ажиллах байдалд анхаарч байна. Ажлын хэсгээс тодорхой санал зөвлөмж гарах болов уу.

-Ойн сав, Усны сан бүхий газар ашигт малтмап эрж хайх, олборлох хориглох хууль баталсан ч хууль хэрэгжихгүй байгаа нь юутай холбоотой вэ?


Хуульзүйн байнгын хорооны дарга Б.Бат-Эрдэнэ:
-Ойн сав, усны сан бүхий газарт ашигт малтмалын хайгуул, олборлолт хийхийг хориглосон хууль төрийн бодлогын баримт бичгийн хэмжээнд ч тусгалаа олсон юм. өнгөрсөн арванхоёрдугаар сарын 15-наас хэрэгжих байсан. Гэвч ойн сав бүхий газрын зураглал хийгдсэн. Усны сав газрын зураглал хийгдэж амжаагүй. Цас зудын байдал зэргээс болоод хойшлуулах шаардлагатай гэдэг саналыг салбарын яамнаас ирүүлсэн.

-Ойн сав, усны сан бүхий газарт ашигт малтмалын тусгай зөвшөөрөлтэй аж ахуйн нэгжүүдэд төрөөс хэдий хэмжээний нөхөн төлбөр олгохоор байна вэ?


-Засгийн газар усны сан, ойн сав газрын хил хязгаарыг тогтоон түүний дагуу нөхөн төлбөр өгөх учиртай. Нийт 140 орчим тэрбум төгрөгийг нөхөн төлбөр яригдана. Гэхдээ тухайн бүс нутагт аж ахуйн нэгжүүд хуулийн дагуу ажилласан эсэхийг хянаж нягтлан шалгахад 140 тэрбум төгрөгийн нөхөн төлбөрийн хэмжээ багасах ч боломжтой. Ер нь төр арилжааны банк дампуурахад 100 тэрбумын бонд гаргаад болж байхад байгаль орчныг сүйтгэхээс хамгаалахад тэр хэмжээний мөнгө гаргахад болохгүй зүйлгүй. "Ойн сав, усны сан бүхий газарт ашигт малтмалын хайгуул олборлолт хийхийг хориглосон хууль гарангуут тусгай зөвшөөрөлтэй аж ахуйн нэгжүүд өөр зүйл яриад байна. Хайгуул бол байгаль орчинд нөлөөлөхгүй гэдэг. Гэтэл ашигт малтмалын хуулиар хайгуулын тусгай зөвшөөрлийг ашиглалтынх болгох алга хөрвүүлэхтэй ижил юм. Иймэрхүү байдлаар байгаль орчин сүйтгэдэг жишээ цөөнгүй. "Монгол газар"-ын Ц.Мянганбаяр Хангайн нурууг сүйтгэж Орхон голыг бохирдуулж дуусгасан. Дээр нь нэмээд монголын арилжааны банкуудаас тусгай зөвшөөрөл барьцаалан их хэмжээний зээл авч элгээр нь хэвтүүлсэн. Энэ бол нэг л жишээ. Хууль тогтоомжийн хэрэгжилт, байгаль орчинд ингэж л хандаж байна.

0ЭКСПЕРТсэтгэгдэл
Сэтгэгдэл оруулахын тулд та хэрэглэгчийн эрхээр нэвтэрнэ үү.
Экспертүүдийн сэтгэгдэл
Одоогоор сэтгэгдэл нэмэгдээгүй байна.