Арилжааны банкнаас зээл авах гэсэн иргэд ихэнх тохиолдолд татгалзсан хариу сонсоод буцаж байгаа тухай бид мэдээлж байсан билээ. Банкууд зээлээ хязгаарлаж, татгалзсан хариу өгч байгаа тухай мэдээлэл тасралтгүй ирсээр байна. Тухайлбал, зарим банк зээлийн лимитээ багасгах шийдвэрийг гаргаж, 40 саяас дээш төгрөгний зээл олгохгүй байхаар шийдвэрлэжээ. Мөн өөр нэг банкны эдийн засагч өрхийн зээл хүссэн иргэнд хэрэглээний зээлээ тодорхойгүй хугацаагаар зогсоосон гэсэн хариултыг өгсөн байна. Тухайн банк болон иргэний нэрийг энд ил тодоор бичих шаардлага байсангүй. Учир нь манай улсын төсөв болон гадаад худалдаа алдагдалтай, мөнгөний нийлүүлэлт хомс болсон сүүлийн гурван сард банкнаас хүссэн зээл нь бүтэхгүй байгаа тухай олон хүн гомдоллож байгаа юм. Цалингийн хэмжээ хүрэхгүй, батлан даалт хангалтгүй, хөдөлмөрийн гэрээ сунгалтгүй зэрэг жижиг шалтгаанаас болж банкны эдийн засагчдын хооронд хангалттай гүйж байгаагаа тэд хэлж байсан.