Хүний хөгжил санд 2012 онд төсөвлөсөн хөрөнгө долоо­дугаар сар гэхэд дууссан. Ха­рин энэхүү санг хэрхэн санхүүжүүлэх талаар УИХ-ын Төсвийн байнгын хороо ху­ралдаж, тодорхой шийдэлд хүрээд байгаа. Тодруулбал, шинэчлэлийн Засгийн газраас санаачилсан 0-18 насны хүүхдүүдэд сар бүр олгох 20, Хүний хөгжил сангаас олгосон 21 мянган төгрөгөө сүүлийн сард болон огт аваагүй иргэд, “Эрдэнэс Таван толгой” компанийн хувьцааны үлдэгдэл 330 мянган төгрөгөө авч чадаагүй байгаа хөгжлийн бэрхшээлтэй иргэд, өндөр наст­нуудад олгох мөнгөний эх үүс­вэрийг бий болгох үүднээс 300 тэрбум төгрөгийн бонд гаргахаар болсон. Энэүү са­налыг ирэх өдрүүдэд бо­лох УИХ, Засгийн газрын хурал­даанаар хэлэлцэж эцэслэн шийдэх юм.

Улмаар Нийгмийн ха­ламж, үйлчилгээний төвийн мэргэ­жилтнүүдийн гаргасан судалгаа, санхүүжилтийн хуваа­рийн дагуу Сангийн яамнаас санхүүжилт хийх ёстой аж.

Хүний хөгжил сангаас 2011 онд 33 мянга 117, 2012 онд 83 мянга 905 иргэн 21 мянган төгрөгөө аваагүй гэсэн судалгааг холбогдох байгуул­лагууд гар­гажээ.

Харин мөнгөө огт аваагүй иргэд шинэчилсэн бүртгэлд хамрагдаагүй, бичиг баримтгүй, гадаадад олон жил амьдарч байгаа гэх мэт шалтгаантай байна.

Хүний хөгжил сангийн дэвтрээ нээлгэж, мэдээллийн нэгдсэн санд орсон иргэд дахин бүртгүүлэх шаардлагагүй. Ха­рин Хүний хөгжил сангийн дэвтэр нээлгээгүй иргэд харьяа сумынхаа Нийгмийн халамж, үйлчилгээний мэргэжилтнээр дэвтрээ нээлгэх шаард­лагатай гэдгийг холбогдох бай­гуул­ла­гуудаас мэдээлж байна. Иргэний бүртгэл, мэдээллийн төвд тухайн хүн шинэчилсэн бүртгэлдээ хамрагдсан тухай мэдээлэл орсон бол төсвийн тодотголоор орж ирсэн мөн­гөнөөс авах эрхтэй. Харин хурууны хээгээ өгч, бүртгэлдээ хамрагдаагүй иргэдэд мөнгө олгохгүй аж.

Гэтэл энэхүү мөнгөтэй холбоотойгоор Хүний хөгжлийн мөнгөө авахгүй бол буцаан татна гэсэн яриа иргэдийн дунд бий болсон. Энэ мэдээллийг албаны эх сурвалжууд няцааж байна. Өөрөөр хэлбэл, иргэдийн дансанд мөнгө орсон. Түүнийг нь буцааж татах эрхгүй аж.