Эх, хүүхдийн эрүүл мэндийг сайжруулах чиглэлээр гарсан “Нөхөн үржихүйн эрүүл мэнд” үндэсний хөтөлбөр, “Эх нярайн эрүүл мэнд” болон “Хүүхдийн эсэн мэнд амьдрахуй” үндэсний стратеги, Засгийн газрын мөрийн хөтөлбөрийн Эрүүл чийрэг Монгол хүн зорилтын хэргэжилтийг хангаж ажилласнаар Мянганы хөгжлийн 4, 5 дахь зорилтын 2015 оны түвшиндээ хүрсэн.

Мөн цаашид энэ байдлыг тогтвортой байлгах, тогтмол бууруулсаар байх асуудал чухал байгаа юм.

Түүнчлэн Эрүүл мэндийн сайдын тушаалаар 2014 оныг эх, хүүхдийн эрүүл мэндийг дэмжих жил болгосон. Өнөөдөр Эх хүүхдийн эрүүл мэндийн үндэсний төв энэ жилийн хүрээнд эх хүүхдийн эрүүл мэндийг сахин хамгаалж, эх нярайн эндэгдэл болоод өвчлөлийн бууруулахад хэрхэн анхаарч ажиллах талаар хэлэлцэж, нээлтээ хийсэн юм.

Уулзалтын үеэр салбарын дэд сайд Ж.Амарсанаа “Манай салбарын хувьд 2014 оныг эх, хүүхдийн эрүүл мэндийг дэмжих жил болгосон. Энэ онд эх, хүүхдийн эрүүл мэндийг дэмжих чиглэлээр анхаарч ажиллах дараах зорилт тавьж байна.

1. Эмэгтэйчүүдийн эрүүл мэндийг сайжруулах, өвчнийг эрт илрүүлж эрүүлжүүлэх

2. Эмэгтэйчүүдийг жирэмсэлтэд бэлтгэх зарчмыг хэрэгжүүлэх, ялангуяа бэлгийн замаар дамжих халдвар, нөхөн үржихүйн эрхтний үрэвсэлт өвчнөөс сэргийлэх

3. Жирэмсний хяналтын чанарыг сайжруулах

Эх хүүхдийн хоол тэжээлийн дутагдлыг бууруулах

4. Нярай, ялангуяа эрт нярай үеийн болон дутуу нярайн тусламж үйлчилгээний хүртээмж, чанар, аюулгүй байдал, асаргаа сувилгааг сайжруулснаар эндэгдлийг бууруулах

5. Өсвөр үеийнхний өвөрмөц хэрэгцээнд тохирсон, ээлтэй тусламж үйлчилгээг өргөжүүлэх, охидын жирэмслэлтээс сэргийлэх

6. Эх хүүхдийн хоол тэжээлийн дутагдлыг бууруулах

7. Жирэмснээс хамгаалах аргын хангагдаагүй хэрэгцээг бууруулж, гэр бүл төлөвлөлтийн орчин үеийн аргын хэрэглээг нэмэгдүүлснээр аюулгүй үр хөндөлтийн шалтгаантай эхийн эндэгдлээс сэргийлэх

Эдгээр зорилтоос хүлээгдэж буй үр дүн нь: Мянганы хөгжлийн 4, 5 дахь зорилтод хүрсэн үр дүнг бататгах, цаашид эх, хүүхдийн эндэгдлийг бууруулах, Эх нярайн тусламж үйлчилгээг хөдөө орон нутагт хүртээмжтэй тэгш болгох, Нярай үеийн болон бага насны хүүхдийн осол гэмтэл, шалтгаантай нас баралтыг бууруулах, эх барихын шалтгаантай эхийн эндэгдлийг бууруулах, эмэгтэйчүүдийн эрүүл мэндийг сайжруулах гэх мэт олон асуудлыг шийдвэрлэх ач холбогдолтой юм” хэмээлээ.

Эх хүүхдийн эрүүл мэндийг дэмжих жил