Эрүүл мэндийн яамнаас 2014 оныг “Эх, хүүхдийн эрүүл мэндийг дэмжих жил” болгон зарласан нь Монгол улсын Засгийн газрын 2012-2016 онд хэрэгжүүлэх үйл ажиллагааны мөрийн хөтөлбөрийн “Эрүүл чийрэг Монгол хүн” хөтөлбөрийн зорилтыг хангах, Аймгийн Засаг даргын 2012-2016 онд хэрэгжүүлэх үйл ажиллагааны мөрийн хөтөлбөрийн “Эрүүл чийрэг Монгол хүн” бодлогын зорилтыг хэрэгжүүлэх, “Эрүүл мэнд-эрс шинэчлэл” хөтөлбөрийн үйл ажиллагаатай нягт уялдаж байгаа юм.

2014 оны 1 дүгээр сарын 9-ны өдөр “Эх, хүүхдийн эрүүл мэндийг дэмжих жил”-ийн нээлтийн үйл ажиллагаа Завхан аймгийн Нутгийн удирдлагын ордонд боллоо. Уг арга хэмжээнд аймгийн Засаг дарга Ж.Жамъянтив, Засаг даргын орлогч Б.Нямдорж, ЗДТГ-ын дарга Д.Түвшинжаргал, ЭМГ-ын дарга Ч.Дэмчигсүрэн, ЗДТГ-ын Нийгмийн хөгжлийн хэлтсийн дарга М.Гүрсэд, НХХ-ийн эрүүл мэндийн асуудал хариуцсан мэргэжилтэн М.Дуламжав, олон улсын байгууллагын төлөөлөгчид болон бусад албаны хүмүүс, иргэдийн төлөөлөл оролцлоо.

Аймгийн Засаг дарга Ж.Жамъянтив нээлтийн үгэндээ, Аймгийн хэмжээнд 2012 онтой харьцуулахад эх хүүхдийн эндэгдэл буурсан үзүүлэлттэй байгаа ч 2013 онд улсын хэмжээнд нялхсын эндэгдлийн түвшин 14.1, эхийн эндэгдлийн түвшин 42.2 байхад Завхан аймагт хүүхдийн эндэгдлийн түвшин 17.8, эхийн эндэгдлийн түвшин 66.0 байгаа нь улсын дунджаас тус тус өндөр байгаад дүгнэлт хийж, 2014 онд илүү эрчимтэй ажиллах шаардлагатай байна.

Түүнчлэн насанд хүрээгүй хүмүүсийн үр хөндөлт зарим сумдад өндөр байгаа тухай мэдээлэлд ч анхаарлаа хандуулах ёстой. Эх хүүхдийн эрүүл мэндийг хамгаалах нь дан ганц эрүүл мэндийн салбарын асуудал биш боловч, энэ салбарт ажиллаж байгаа эмч, эмнэлгийн ажилтнуудын нөр их хөдөлмөр, хичээл зүтгэл, идэвхи санаачлага, ажил хэрэгч байдал, чин шударга, сэтгэл тавьсан ажил үйлчилгээтэй салшгүй холбоотой гэдгийг онцоллоо.

Улсын хэмжээнд эхийн эндэгдлийн 60 хувийг эх барихын шалтгаантай эндэгдэл эзэлж байгаа

Мөн аймгийн ЭМГ-ын дарга Ч.Дэмчигсүрэн “Эх, хүүхдийн эрүүл мэндийг дэмжих жил”-ийн үйл ажиллагааны зорилго зорилт, цаашдын чиг хандлагын талаар мэдээлэл хийлээ. Улсын хэмжээнд эхийн эндэгдлийн 60 хувийг эх барихын шалтгаантай эндэгдэл эзэлж байгаа ба аюултай үр хөндөлтийн шалтгаантай эхийн эндэгдэл нийт эндэгдлийн 14 хувийг эзэлж байна. Ялангуяа ажилгүй иргэд, малчид, оюутнууд эхийн эндэгдэлд өртөх эрсдэл өндөр байгаа юм.

Ингээд улсын хэмжээнд болон аймаг орон нутагтаа хийсэн судалгааны үр дүнг үндэслэн аймгийн ЭМГ-аас дараах зорилтуудыг тавьжээ.

1. Эмэгтэйчүүдийн эрүүл мэндийг сайжруулах, өвчнийг эрт илрүүлж, эрүүлжүүлэх

2. Эмэгтэйчүүдийн жирэмсэлтэнд бэлтгэх зарчмыг хэрэгжүүлэх, ялангуяа бэлгийн замаар дамжих халдвар, нөхөн үржихүйн эрхтний үрэвсэлт өвчнөөс сэргийлэх

3. Жирэмсний хяналтын чанарыг сайжруулах

4. Нярай, ялангуяа эрт нярайн үеийн болон дутуу нярайн тусламж үйлчилгээний хүртээмж чанар, аюулгүй байдал, асаргаа сувилгааг сайжруулснаар эндэгдлийг бууруулах

5. Хүүхдийн тусламж үйлчилгээний чанарыг сайжруулах, бага насны хүүхдийн осол гэмтлийг бууруулах

6. Өсвөр үеийнхний өвөрмөц хэрэгцээнд тохирсон, ээлтэй тусламж үйлчилгээг өргөжүүлэх, охидын жирэмслэлтээс сэргийлэх

7.Эх хүүхдийн хоол тэжээлийн дутлыг бууруулах

8. Жирэмснээс хамгаалах аргын хангагдаагүй хэрэгцээг бууруулж, гэр бүл төлөвлөлтийн орчин үеийн аргын хэрэглээг нэмэгдүүлснээр аюултай үр хөндөлтийн шалтгаантай эхийн эндэгдлээс сэргийлэх үйл ажиллагааг хэрэгцээнд тулгуурлан үр дүнтэй зохион байгуулж, иргэд олон нийтийн оролцоотойгоор дэмжлэгт удирдлагаар ханган ажилласнаар дараах үр дүнд хүрнэ гэж үзэж байгаа юм.

Үүнд: 1. Эх нярай, хүүхдийн тусламж үйлчилгээний тэгш бус байдлыг бууруулж хүртээмж чанар сайжирсан байна.

2. Нярайн үеийн болон бага насны хүүхдийн осол гэмтлийн шалтгаантай нас баралт буурна.

3. Эх барихын шууд шалтгаантай эхийн эндэгдэл буурна.

4.Эмэгтэйчүүдийн эрүүл мэнд сайжирна.

5.Гэр бүл төлөвлөлтийн орчин үеийн аргын хэрэглээний хувь нэмэгдэж охидын жирэмслэлт буурна гэдгийг хэллээ.

Түүнчлэн энэхүү “Эх, хүүхдийн эрүүл мэндийг дэмжих жил”-ийн нээлтийн үйл ажиллагаан дээр эх барих эмэгтэйчүүдийн зөвлөх эмч Нармандах болон эрүүл мэндийн салбарт 30 гаруй жил ажилласан Нина нар мэдээлэл өгч, санал бодлоо хуваалцлаа.

Үндэсний болон аймгийн дэд хөтөлбөрийн эх хүүхдийн эрүүл мэндийг сайжруулах зорилтын хэрэгжилтийг хангаж ажилласнаар Мянганы хөгжлийн 4, 5 дахь зорилтыг 2015 оны түвшинд байлгах, цаашид бууруулах асуудал ийнхүү чухлаар тавигдаж байгаа юм.

Завхан аймагт "Эх хүүхдийн эрүүл мэндийг дэмжих жил"-ийн нээлтийн үйл ажиллагаа боллоо