Батлан хамгаалахын сайд Ж.Энхбаяр үүрэгт ажлаа хүлээн авч, анхны тушаалаараа өөрийн цэрэг, улс төрийн бодлогын зөвлөхийг шинээр томиллоо. Тэрбээр цэргийн бодлогын зөвлөх хошууч, генерал М.Борбаатарыг үүрэгт ажлаас нь чөлөөлж, хошууч, генерал Д.Мягмарыг томиллоо.

Мөн улс төрийн бодлогын зөвлөхөөрөө Н.Жалбажавыг томилсон байна. Харин бүтэц зохион байгуулалтын хувьд Цэргийн эрдэмтэн, мэргэжилтнүүдийн зөвлөл гэх орон тооны зөвлөл байгуулсан байна. Мөн Нийслэлийн цэргийн штабын дарга Ж.Болдбаатарыг ажлаас нь чөлөөлж, Батлан хамгаалахын хуулийн  зөвлөх И.Эрдэнэбаатарыг томилжээ.

Энэхүү зөвлөлд нь Батлан хамгаалахын яамыг өмнө нь удирдаж байсан сайд, ЗХЖШ-ын дарга, энэ чиглэлээр дагнан судалдаг эрдэмтэн мэргэд багтаж, сайдыг шийдвэр гаргахад зөвлөх үүрэг хүлээх ажээ. Түүнчлэн шинэ сайд өнгөрсөн сарын дундуур галд өртөж, орон гэргүй болсон Зэвсэгт хүчний 084 дүгээр ангийн ахлагчдад өчигдөр гэр олгосон байна.