Хамтарсан Засгийн газар тарах мэдэгдэл хийсэн үеэс МАН дангаараа байгуулах Засгийн газрын сайд нарын талаарх яриа гарч эхэлсэн.Энэ шуугиантай холбоотойгоор Батлан хамгаалахын сайдын суудалд томилогдоно гэгдээд байгаа УИХ-ын гишүүн Ж.Энхбаяртай ярилцлаа.

-Хамтарсан засгаас гарах болсноо сайд нар албан ёсоор мэдэгдээд, огц­рох өргөдлөө өг­чих­лөө. МАН-ын Удир­дах зөвлөл хуралд­сан хэрнээ сайд нараа сонгохгүй байгаа нь ямар учиртай юм бол?

-Сайд нарын асуу­далд би ямар нэг зүйл хэлмээргүй байна. Энэ бол цэвэр улстөр яригдаж байгаа хэрэг. Миний хэлсэн үг ямар нэгэн байдлаар нөлөө үзүүлэх байх. Тиймээс янз бүрийн зүйл яримааргүй байна.

-Таныг Батлан хам­гаалахын сайдаар томилох тухай яригдаж бай­гаа болохоор уу?

-Залуу хүний хувьд тиймэрхүү зүйлийг сонирхсонгүй. Би даруу байх зарчим баримталдаг.

-Таныг аавынхаа нэр хүндээр сайд болох боломж­той. Бас нэр цэвэр, зүүний сүвэгчээр ч гараад ирж мэдэх сэргэлэн нөхөр. Тиймээс Батлан хамгаалахын сайдын суу­далд тухална гэх юм билээ?

-Би өөрийгөө дүгнэж хэлж мэдэхгүй юм даа. Тэр тухай сонсоогүй л юм байна. Бид Японд аж­лаар явж байгаад ирсэн болохоор энд улстөр хэр­хэн өрнөж байгааг сайн ойлгохгүй байна.

-Хэрвээ намын Удир­дах зөвлөлөөс сон­гоод, Батлан хам­гаалахын сайдаар томилбол та ажиллаж чадах уу?

-Энэ талаар тодорхой хэлэх зүйл алга. Тэгээд ч энэ тухай ярих зохистой цаг хугацаа нь биш.

-Засгийн газар яаж ч бүрдсэн цаашид ажиллахад маш бага цаг хугацаа үлдчихлээ. Тэгэхээр урьдын болон одоогийн хийгдэх ажлууд буруудаад ирвэл  шинэ байгуулагдах Засгийн газрын нуруун дээр унах юм биш үү?

-Богино хугацаанд эрч, хүчтэй ажиллаж чадах баг л бүрдүүлэх хэрэгтэй. Энэ үлдсэн зур­гаан сарын хугацаанд жилийн ажлыг хийж чадах тийм л хүмүүс байх ёстой.

Өөрөөр хэлбэл нэр цэвэр, салбартаа элэгтэй, тухайн салбараа мэддэг хүн гэсэн үг.

Эцсийн шийдийг намын удирдлага гаргана. Ерөнхий сайдын бүрэн эрхийн асуудал. Мэдээж энд кабинетын зарчим бий.

-МАН ирэх сонгуульд нэр дэвшихгүй хү­нээ сай­даар томилох сураг дуул­даад байгаа. Тэгэ­­­хээр сайдын суу­далд са­наархах хүн хо­вор байгаа юм болов уу?

-Улстөрийн намын хувьд нэг сайд бол УИХ-ын нэг гишүүн гэсэн үг. Өнөөдөр байгаа хуулийн хүрээнд ор нь гарсан зургаан сайдаа яаралтай бүрдүүлээд, цаг алдалгүй нийгмийн өмнө хариуцлагаа хү­лээгээд цаашид ажил цал­­гардуулахгүй ажил­даа шуурхай орох ёстой. Ийм чадавхи, боловсон хүчний нөөц МАН-д хангалттай бий.

-Гэхдээ Удирдах зөвлөлөөс шийд гаргахгүй л байна шүү дээ?

-Ямар шийд.

-Удирдах зөвлөл хуралд­сан хэрнээ сайд нараа сонгохгүй бай­на?

-АН-ынхан пүрэв гарагт л өргөдлөө өгсөн. Цаг үеийн байдлыг намын удирдлагууд яарал­тай авч хэлэлцэн дүг­нэж үзсэн. Зарчмын гол шийдлүүдээ гар­гачихсан.

-МАН-ынхан байнга л боловсон хүчнээрээ бахарх­даг. Гэсэн ч сайд нараа сонгохгүй байгаа нь фракциудаас болоод байгаа юм биш үү?

-Манай нам ямар нэг зүйл дээр фракци, бүлэглэл болоод хуваагаад байдаг зүйл тун бага.

-Тухайлбал дэд сайд нарын суудлыг за­луучууддаа өгөхөөр төлөв­лөөд байгаа гэсэн?

-Мэдээж дэд сай­дуудыг Засгийн газар өөрийн бүрэн эрхийн хуга­цаанд томилох болол­цоотой. Тэгэхээр салбар салбартаа өсч яваа шинэ, залуучуудыг таниулах, улстөрийн албан тушаалд гаргаж ирэх нь зүйтэй. Хэрвээ тийм бодлого гарвал би хоёр гараа өргөөд ч болов дэмжинэ.

-Шинэ сайд нарыг хүн бүр хүлээж байгаа, яаж ажиллах нь вэ гээд л?

-Энэ долоо хоногийн сүүлээр асуудал бүрэн шийдэгдчихсэн байх болов уу. Сонгогдсон хүмүүс нь ажилдаа орчих байх.